俗話都有話「娶妻求淑女」，美職聯嘅洛杉磯銀河球員就真係娶到好老婆嘞！前排以當路雲為首話唔鍾意「萬人迷」碧咸（圖左），搞到成隊波嘅氣氛好唔融洽，銀河眾球員班老婆、女友就自動諗計搞BBQ，希望可以一大班人聚埋一齊，增加大家嘅凝聚力，咩嘢唔開心嘅事都可以一筆勾銷，咁做可以齊心搞好隊波喎！我求大俠對於「BBQ座談會」嘅成效，存在唔少疑問，搞BBQ嘅場地咁大，碧咸同其他人都可以唔一齊坐，可以有幾凝聚就要睇吓對方嘅意願，之不過班靚靚老婆、女友鬥靚，好齊心咁搞function俾另一半happy吓，班男人唔會唔畀面連「做戲」都唔識啩！