其實觀塘繞道一向都係飛車黨鬥車嘅熱門路線，不過早前警察用平民擋瘋狂戰車，先引起廣泛注意。眼見十幾二十架車衝到埋身，喺你架車側邊左穿右插，真係隨時嚇破膽方寸大亂。究竟面對飛車黨埋身，應該點做先最安全呢？飄移高手盧向榮（Wing）提醒大家最緊要「定」，因為「越想避就越危險」！
記者：許維雅
攝影：陳陶鈞、譚盈傑
眾所周知非法賽車活動一直不滅，久不久就會有飛車黨群片搞出意外嘅新聞，由於時間地點不定，警方好多時都束手無策。作為普通司機，尤其係我哋呢啲技術麻麻嘅女生，遇到佢哋都好容易進退失據，慌亂下做錯決定嘅話，後果可以好嚴重。今日就搵嚟香港飄移車手代表WingLo為大家詳細講解唔同情況嘅對策，盡量將受連累發生意外嘅可能性減至最低。
Case1 大直路群片
人肉路障鬧得滿城風雨，大大條三線行車嘅繞道，又真係幾啱班飛車黨胃口。行得高速，車速都唔會低，突然發現後面有一大堆車極速衝緊上嚟，即使有經驗嘅司機都可能會緊張。應該點做？
Do
1.留意後鏡
平日揸車一定要多望側鏡及倒後鏡，車櫳內嘅倒後鏡尤其重要，全因你可以觀察到後面車輛嘅車速同距離，對判斷路面情況同行車安全好有幫助。
2.懶理挑釁
上高速公路時盡量靠左行慢線，即使後面架車逼你都要保持冷靜，唔好作特別反應，保持均速行駛，佢哋自然會無癮離開。
Don't
1.切線避開
千祈唔好胡亂左右切線避開，因為估計後面車輛點做根本就唔合邏輯，你越亂反而影響佢哋對你所行嘅路線嘅判斷。
Wing教路：
保持本來嘅行車線同速度，佢哋就會識得避開你。
Case2 入彎遇瘋狂Cut線
早排觀塘繞道嘅意外，飛車黨夠膽喺單線掉頭走，佢哋真係無咩唔敢做。記者就親眼見過飛車黨由宋皇臺道右轉上橋，成班亡命車手就趁入彎攝位，其他車當堂停晒喺度等佢哋走。咁又啱唔啱呢？
Do
1.多線入彎位更要留神
多線入彎應多加留神，因為每架車轉彎嘅孤度都唔同，加埋飛車左穿右插增加咗危險性，Keep住自己嘅「火位」之餘，亦小心頭尾碰撞。
Don't
1.突減速
入彎時突然減速會令重心改變，引致行車循迹性減低，好容易自己製造危險。
2.忽然煞車
入彎時嚇一嚇就煞停車輛，後車肯定無法預計這突如其來之舉，後果可以極為嚴重。
Wing教路：
揸穩軚盤如常入彎，若果左搖右擺就更容易同佢哋有碰撞。
總結
Wing：「其實遇到飛車黨都唔使太驚，保持鎮定先係自保安全嘅最佳方法。若然真係好驚，又發現路邊有避車處，就喺安全情況下，盡量靠左駛入避車處，但速度太快就唔好勉強進入，同埋唔係個個避車處都可以亂咁用，高速公路嗰啲就唔用得。」
三大非法賽車高危點
見到飛車黨都怕怕，最好方法當然係避之則吉，喺香港嘅非法賽車黑點都唔少，網上傳聞嘅三大熱點分別係大帽山、石澳及荃灣川龍。見佢哋高速見車過車爬頭，睇見都動魄驚心。大家入夜後就盡量唔好行經以上三條路，安全為上。
飆得放心
Wing指出香港近年已經少咗好多飛車，因為無論賽車抑或飄移，大家都鍾意返珠海玩。「好多年前都會去啲未開發嘅工業邨鍊車，但近年警方打擊得犀利，同埋香港都無乜荒廢地方，所以都係上珠海玩。」其實年輕人總會經過沉迷開快車嘅階段，尋求刺激嘅飛車黨喺馬路上亂飛亂衝，香港房車錦標賽車手陸淦認為，要解決問題，「政府加強宣傳教育先係最治本嘅方法。」
