今屆香港先生由盛年組25歲嘅許家傑奪得冠軍，少年組冠軍就係18歲嘅陳偉洪，賽果算合理，有啲網友噚日就話許家傑個樣有啲似有線主播區永權，有啲又話鄭裕玲（嘟嘟）開口夾着脷，叫錯咗陳貝兒做「陳貝詩」，而千嬅就俾人笑講「吊吊fing」，千嬅就話要澄清：「我冇講過吊吊fing呀，我係話啲前輩港男出嚟fingfing吓件衫令女士們叫破喉嚨。」
嘟嘟對於俾人話講錯嘢，佢話：「綵排時候我有叫佢貝兒又叫佢Janice，叫到亂晒，咁講錯咗咪唔好意思囉，陳貝兒好淡定，千嬅就比上年進步。」有指陳貝兒有機會成為嘟姐接班人，嘟姐話：「唔可以咁講，無綫需要好多唔同類型嘅主持人。」
另外，參賽者翻版王貽興李偉健俾人問到點向嘟姐求婚時，佢即場唱出呂方一首金曲，咁搞法唔怪得佢會輸啦，嘟姐就話：「冇乜所謂，自由發揮啫，我同呂方又唔係仇人。」
陳貝兒唔敢搶飯碗
陳貝兒第一次做大騷司儀，表現尚算OK，佢話：「我都唔知嘟姐叫錯我個名，冇所謂喎，嘟姐都有過兩招畀我，我覺得好enjoy同好funny，都想做港姐司儀，因為想拍志偉哥。」有人讚佢夠高有台型又夠定，可以做嘟姐接班人，佢話：「唔敢，嘟姐又唔係退休，佢仲做緊㗎，唔使人接班住。」
有網友話冇咗伍詠薇令個節目大為失色，原來佢同老公去咗新加坡旅行，佢透過長途電話講：「咁我下年返嚟做囉，其實摸吓啲港男只係鼓勵吓，咁會加強對參賽者嘅信心，又有娛樂性。」