錯、錯、錯。崔水安噚日選特首，條數計極都錯。明明有286個提名，點解佢最後只得282票？明明有297個選委到場，點解打開票箱只係得296票？但相信最令崔水安費解嘅係，明明係小圈子選舉，點解同邊個喺度玩嘢，搞到佢成為澳門屎上最強嘅白票之王、有成14張白票咁「多」？
賭王狠批白票黨
對於呢個咁離譜嘅現象，比崔水安更吹得嘅賭王喺現場記者不斷追問下，狠批投白票嘅選委「錯得好緊要」。賭王話邊個投白票「心知有數」，投白票嘅會唔安樂，仲預測呢班白票黨今晚會瞓唔着，因為明明二百幾個選委都啱晒，佢哋竟然唔跟。
前年香港小圈子選煲呔連任特首，賭王選前話邊個投白票「一定有辦法」知道，搞到滿城風雨。今次輪到澳門有班選委憑良心投白票，賭王又話人哋心中有數，會唔安樂同瞓唔着，同上次一樣咁赤裸裸，仲露骨過啲o靚模舔雪糕同滴牙膏。
賭王投票前又大讚崔水安適合做特首，原因竟然係「晚晚都喺電視見到佢」，老崔背後又有中央支持，可以維持澳門繁榮穩定。但究竟崔水安有乜才能？賭王淨係識講：「北京保證，你經濟實好，財政亦冇問題，保安又冇問題。」
賭王答成咁又好難怪佢。事實上，崔水安噚日喺記者會上不但每間傳媒只限問一條問題，答問題時又只係照稿讀，十足十老董加人肉錄音機林D9嘅混合體。最奇怪係崔生無論答葡文、普通話同英文問題，都要戴番個中文繙譯耳機，令人質疑呢位澳門新特首唔通語言天份仲差過煲呔?
對於得一個人出嚟「選」，賭王話「正如我請伙記，都唔係一百幾十個咁去揀，北京見一個就話夠嘞。」講係咁講，但八方現場聽住澳門選管會主席讀「崔世安」三粒字讀咗282次，足足30分鐘，崔極都未崔完，雖然唔使再畫五十幾個「正」字出嚟，改用電子屏幕顯示票數，但唔少選委悶到爆，要中途離場唞氣，有選委又玩自拍、互拍，以致團體照乜都玩齊。
mailto:[email protected]