港鐵康城站噚日通車,石崗菜園村幾十個居民嚟踩場,皆因唔妥運輸及房屋局局長鄭汝樺夾埋港鐵為咗興建廣深港高鐵,強行拆村逼遷。班村民唔知喺邊度收風,聽見鄭汝樺會嚟主持啟用儀式,但點知康城站連啟用禮都冇搞,鄭局長影都唔見。
班村民嬲到震,搵咗個戴面具嘅冒牌鄭汝樺做頂包,坐喺架紙皮扮嘅高鐵裏面,係咁撞埋去啲菜園村居民度,仲嚇到個跟大人嚟踩場嘅小妹妹驚到喊晒口。
港鐵聽見班村民踩場,一早報定警叫齊軍裝同便衣人員實班村民,又派代表連村民畀鄭汝樺封抗議信都收埋。班村民為表明就算赤手空拳,都堅持不遷不拆,喺康城站個月台度連鞋都除埋,赤腳搭車,沿途仲派海報同傳單畀市民,爭取公眾支持。