上星期一講董事長S在陸羽請飲茶，講電話公司之中環所在地，左丁山話聽落似在現時中國建設銀行中環分行或愛瑪仕所在地。S太日日睇住〈GG細語〉，剪低畀董事長S過目。董事長S睇完，來電澄清：「左兄你大概聽錯了，幾十年前嘅電話公司在電車路東亞銀行側邊嘅皇室行，告羅士打大廈旁，後來併入咗置地廣場。你講嘅中國建設銀行中環店以前係廣東銀行，再之前係廣東省銀行。廣東銀行係宋子文、宋子安佢哋控股嘅。」記得嘞，廣東銀行賣咗畀SecurityPacific，呢間銀行又賣咗畀美國銀行，改名為美國銀行（亞洲），家又變成中國建設銀行一部份。兜兜轉轉，經歷數十年，宋子文嘅銀行卒之俾中華人民共和國收歸國有！
董事長喜歡到陸羽飲茶，茶室名陸羽，當然係取名自唐代茶聖陸羽，陸羽撰茶經，聽鄭培凱教授講，係人類第一次總結種茶、製茶及飲茶的經驗而成書。商務印書館今個月出版咗一本新書，由鄭培凱教授編選，書名就叫做《茶書雋語》，一百二十七頁，輕巧易攜帶，讀落幾有「茶味」。鄭教授選咗一百條雋語，從歷代上百本茶書中挑選出來，底本係鄭教授與朱自振編著嘅《中國歷代茶書匯編校注本》（香港商務出版）。呢本書彙集咗唐代至民國共一百一十四種茶書，適合研究茶道嘅人士參考，如左丁山呢類識少少之人，讀呢本《茶書雋語》已經夠爽，譬如茶之色彩：「點茶之色，以純白為上真，青白次之，灰白次之，黃白又次之。天時得於上，人力盡於下，茶必純白。」何解左丁山從未見過純白之茶？原來「茶色貴白。而餅茶多以珍膏油其面，故茶有青黃紫黑之異。善別茶者，正如相工之視人氣色也，隱然察之於內。以肉理潤者為上。」邊度去搵啲「純白」茶呀？左丁山果然係大鄉里，飲茶係井底蛙而已！至於茶有茶香，我哋嗌一聲：「好香呀！」以為係好嘢，原來不然，書云：「茶有真香，而入貢者微以龍腦和膏，欲助其香。建安民間皆不入香，恐奪其真。若烹點之際，又雜珍果香草，其奪益甚，正當不用。」以後知道了，香茶不是好茶！