職工盟屬下嘅建築地盤職工總會內訌，噚日工會喺旺角倫敦大酒樓開會員大會，選新一屆理事，工會理事長孫龍弟同部份原本諗住推遲個選舉，擇日再選，但最後唔成功。參選嘅孫龍弟即時宣佈拒絕再玩，仲同百幾個會員拉隊走人，杯葛選舉，結果搞到餐飯不歡而散。孫龍弟仲話，遲啲會登報退出職工盟，唔排除會拉隊去其他工會落腳。
建築工會理事張德興同八方講，工會有13名理事，最初只得13人報名參選，但截止提名當日突然多咗13人報名。佢話選舉有輸有贏冇乜所謂，點知噚日去到酒樓，無端端由最初擺12圍加到30圍，佢質疑有人做手腳，想操控選舉。但職工盟秘書長李卓人反駁話，選舉有競爭理所當然，可能有人怕輸所以搞局，又講笑話噚晚選舉精采過澳門選特首，因為唔係獨腳戲。