靚女覓食　夜夜鹹蛋蟹

近日娘親心煩、多疑、失眠，令我不勝其煩，有人獻計，「送她去吉隆坡吧！一蚊馬幣便辣死你阿媽！」我不是忤逆子，只是在吉隆坡可以由早食到晚，仲有能令女人喪失本性的Megasale，她終於不再嘮叨了。

記者、攝影：吳允冲
鳴謝：馬來西亞旅遊促進局、馬來西亞航空

一蚊辣死你阿媽

每朝早，吉隆坡街頭都有唔少車仔檔賣早餐，但馬拉人愛吃的不是三文治、熱香餅，而是椰漿飯「NasiLemak」，華人都稱作「辣死你阿媽」！真傳神！才一摳（馬拉人稱錢作「摳」）的辣死你阿媽，製作可算認真，一塊蕉葉，包着白飯、自家製的Sambal辣醬、半隻烚蛋、魚乾、花生，食一啖，辣味與酸味攻入食道，足夠令你醒神，不再瞌眼瞓。飯後再來一隻蕉，就是一餐地道的馬拉早餐。

■1摳椰漿飯、7毫子隻蕉、1.2摳薑汁拉茶，食飽飽都係$6.3港幣

■拉茶Tehtarik越拉越香滑。

a.MedanImbiFoodCorner

電話：（60）3-21444778
地址：No.2-1,JalanMedanImbi,OffJalanImbi

粉腸食唔停

短短一條燕尾路已有肉骨茶店ABCDE，究竟邊間好食呢？幸有當地人指點迷津到「彭強」。開業30多年的彭強，湯底24小時不停翻滾，用上十幾種藥材，胡椒味特重，飲一碗，感覺熱氣從頭頂排出。老闆娘玲姐一邊講解一邊吃，加蒜茸加辣椒加黑豉油，似乎食得投入過我。「唔係賣花讚花香，我哋用新鮮豬肉，用晒先叫人送貨。」千層粉腸看來花好多工夫做，特別有咬口，令我食唔停口。「用筷子穿，兩、三下就搞掂啦，有幾複雜？好容易啫！」飲完肉湯唔該呷一啖特濃鐵觀音，才是真正的肉骨‧茶。

■玲姐和丈夫強哥，日日忙到無停手。

■肉骨茶用十幾種藥材加豬骨24小時不停煲，絕對是精華。$61

■將一條粉腸穿成3至5層的千層粉腸，特別有咬口。
$35

b.旭日（彭強）肉骨茶

電話：（60）3-21489334
地址：No.19B,JalanMedanImbi,OffJalanImbi

海鮮誇啦啦

入夜，亞羅街（JalanAlor）人頭湧湧，像我們的廟街，滿街食肆，喇沙、炒貴刁、燒雞翼……究竟食邊樣先？街坊介紹我去新翠園，平平無奇的鹹蛋黃炒蟹，加入充滿南洋風味的咖喱葉，味道即刻變得複雜，薄薄的鹹蛋黃漿裹在蟹上，有鑊氣但不滴油，正！再來一碟白胡椒蟹，比鹹蛋黃蟹清淡，我KO了一碟。「新出嘅怪味啦啦，要唔要試？」老闆娘Karen問，啦啦？原來是馬拉話貝殼咁解，讀音是「拿啦」。怪味啦啦即是怪味炒蜆，用咖喱葉、蝦乾炒，特別處是加入花奶，令炒蜆有獨特香味，好食到難以形容，我又KO了一碟！此時Karen端來燒魔鬼魚，「招牌菜嚟㗎！要趁熱食！」澆點酸柑汁辟腥，入口有淡淡咖喱和黃薑味，嫩滑中帶煙韌肉質，令我這個唔食魚的人都食得好開心。還有奶油蝦、串燒雞呢……噢！Karen，Imissyou！

■亞羅街入夜後人頭湧湧。

■英國美少女3人組：「呢度氣氛好，價錢平到你唔信！」

■馬來西亞最出名的燒魔鬼魚，燒得香口惹味。$61

■鹹蛋黃炒蟹，加入咖喱葉能提升味道層次，$73。

c.新翠園

電話：（60）3-21444290
地址：No43,JalanAlor

榴槤貴過海鮮

未食飽？仲有街口的榴槤檔，阿伯睇榴槤多過睇靚女，邊個靚邊個唔靚一望就知。現時當造的有3款：竹腳甘中帶苦，底部有個篤；D24肉多又甜；極品貓山王就甜中帶甘，令人回味，不過產量少，一個盛惠170摳（$370），仲貴過食海鮮！馬拉榴槤是樹上熟，成熟時會自己跌落嚟，不能隔夜不能出口，去到要食多幾個！提提大家：千萬不能帶返酒店食，要在街頭就地正法！