【09書展星戰場】o靚模周秀娜昨日繼續出招宣傳寫真，在一片反對聲中如期在書展上向fans獻吻，可惜中間原來隔着膠片，擺明搵笨，令清晨5時半便往會展霸頭位的少男fans只嘗到一陣膠味。33歲的椋名凜則東施效顰，在大劉旗下的崇光百貨外派豆漿銷書，結果被保安驅趕，只逗留15分鐘便草草收場。
周秀娜的寫真集《KissyChrissie》，憑食雪糕及刷牙性感照大收宣傳之效，雖然被指意識不良連日遭o靚模圍攻，但仍無損銷量，她所屬公司指截至昨日為止已賣出約16,800本，周秀娜昨日履行諾言在書展舉行獻吻會。不過周秀娜親吻fans臉頰時，中間卻隔着一塊膠片，令一眾電車男體味朱唇溫度的幻想完全破滅，最後也只得5男1女fans獲獻吻。
5時半到場排頭位
周秀娜的獻吻會吸引了近200名fans到場，據知大會為控制人流，只派發200個籌。問到為何隔着膠片錫錫，周秀娜說：「咁樣佢哋就唔會唔洗面，又可以留念，如果錫晒咁多人，我驚錫到嘴都歪。」會否舉行終極祝捷會？她說：「搞個抱抱會，第二Round特別啲。」不知她屆時與fans擁抱時，會否先特製一套發泡膠衫護身？
昨日排頭位取得周秀娜香吻的fans名叫Paco，他清晨5時半已到場排隊，錫錫前才知中間要隔着膠片，但仍覺得值得，他說：「我噚晚有洗面，仲打算將塊膠片鑲起。」排第二位的阿輝則早上7時到場排隊，他說：「有膠片隔住唔失望，不過冇就更好，塊膠片可以留念。」唯一獲獻吻的女fans阿Ling則於9時許到場，她大讚周秀娜又靚又可愛活潑，認為隔着膠片反而更好，因為膠片可保存。
近日o靚模是非日日新，風頭躉Lavina（鍾蕙芝）被指借富家子William博宣傳谷寫真，結果男方與女友Fiona分別發聲明還擊。周秀娜自言認識William及Fiona，她暗寸Lavina說：「佢唔係賣晒㗎咩？點解要造勢呀？」再提到鄧麗欣（Stephy）早前狠批o靚模影響社會風氣，結果其愛情小說《陪著我走》錯字百出同樣教壞細路，周秀娜說：「幾好吖，咁有故事性，大家唔好太過攻擊佢，可能佢想表達其他嘢。」可知Stephy想表達甚麼？她說：「要佢自己先知。」
椋名凜派豆漿被趕
此外，椋名凜為宣傳寫真postcard《Kiss》及飲食書《回家之味》，昨日穿背心短裙仔直踩銅鑼灣劉鑾雄旗下物業崇光百貨門外派豆漿，準備了約40杯豆漿的她全程大小通殺，阿伯細路無一放過。
由於昨日是周末，行人眾多，加上圍觀者眾，引來崇光百貨的保安人員阻止椋名凜繼續派豆漿，保安員更大叫：「行開啲，唔好阻住門口呀！」其後有警員到場了解，令椋名凜大為尷尬，前後只逗留短短15分鐘便草草收場。之前周秀娜和Kama已分別派過雪糕及牛奶，椋名凜派豆漿似新意欠奉，她卻說此舉是為答謝fans支持，還說：「豆漿可以豐胸同有助皮膚靚嘛，我日日都飲㗎。」
採訪：魯萍、卓寶花 攝影：林德雄、陳志嵐
今日看點
‧最受歡迎o靚界女神Angelababy千呼萬喚始出來。
‧Square搞簽名會，未知Kama會否現身撐緋聞男友James？
‧陳志雲現身書展，且看是但男會否騎劫簽名會。
今日簽名會時間
‧1:00pm 古巨基《古SirIQ王》
‧2:00pm Angelababy《MissAngelababy》
‧3:00pm 江若琳《小公主浪跡天涯》
‧3:00pm 傅穎《我會快樂的》
‧4:00pm Square《360°》
‧4:00pm 梁榮忠《愛的禮物》
‧4:00pm 周麗淇《幸福》
‧4:30pm 陳志雲《志雲首選食府》
‧4:30pm 蕭希榆《eyeScream》
‧6:00pm 少爺占《小小雪》
‧7:00pm HotCha《3x39°C》
資料來源：香港書展
花絮
謝天華贊成派奶
謝天華和葉翠翠昨現身書展tvbuddy攤位，宣傳其新戲《LaughingGor之變節》，派發特別印製的書籤及記事簿等給市民，天華笑言很開心獲公司揼本宣傳，更笑謂派書籤跟派奶和雪糕相差無幾，他笑說：「咁人會肚餓，派嘢食都好合理。」對於Stephy新書錯字連篇，他說：「咁就抵打，出書應該經過好多審查。」
江若琳識趣封胸
江若琳和Square昨現身書展宣傳新書，現場聚集大批fans，場面混亂，工作人員一度干預。江若琳指其作品《小公主浪跡天涯》印2萬本，賣出5,000本，又稱簽名會不會作性感打扮，因自問冇身材，對於Stephy的小說錯字極多，她認為是校對問題。Square則謂寫真集加印會即場除衫，並強迫江若琳穿比堅尼。
陳佐洱女認錯字
o靚模寫真人人加印，由港澳辦前副主任陳佐洱女兒陳晴推出的熊貓書一樣加印，之後更會出簡體字版和英文版，陳晴昨日在書展宣傳，獲霍震霆、劉鑾雄兒子劉鳴煒及盛智文等撐場。
陳晴自爆新書有「5粒錯字」，希望各界體諒，又指其父前晚才收到新書，她說：「爹哋都好愛動物，會照顧啲流浪貓狗。」
麥玲玲出心出力
農夫成員C君今年出書，昨在書展搞簽名會，獲拍檔陸永及麥玲玲現身撐場，現場約有20多名fans排隊等候。麥玲玲指C君今次出書乃由她代起書名及擇吉日發行，希望一切順利兼有助銷量。C君被問到送甚麼禮物給麥玲玲以示感謝時，他笑說：「咪送咗書囉，今次係我第一次出書同搞簽名會，我都好緊張，好彩有人嚟捧場。」
朱薰收打氣大波
朱薰昨日在書展為《潮語新聞字》舉行簽名會，雖與周秀娜的獻吻會打對台，但仍有近百名fans排隊支持。帶同兩個大氣球撐場的小儀笑說：「我送對大波嚟撐場。」
對於Stephy錯字百出，朱薰笑言已向其唱片公司自薦任校對，問她會否覺得錯字多得離譜？她說：「有啲都係，我打速成都有錯字，但冇佢咁多。」
