豬流感落戶香港，政府打算年底幫市民打疫苗，正同私家醫生商討安排，但未講掂數。有官員不點名指一些私家醫生獅子開大口，要政府提供疫苗兼津貼打針費，醫學會會長謝鴻興對政府背後放風亂噏激到紮紮跳。
鴻興大佬話，除咗醫學會外，政府亦有同西醫工會傾，官員批評醫生狼死，一般市民可能誤會醫學會從中作梗，其他西醫點計數佢唔知，但醫學會無端被屈好唔抵。佢話醫學會從來冇同政府講價，甚至願意做義工幫市民注射疫苗。據講醫學會向來同政府有君子協定，討論問題未有共識前可各自表述，但唔可以引述對方說話，鴻興大佬話希望大家遵守遊戲規則，否則日後好難傾偈。