馬交新特首今日誕生，崔世安贏到冇朋友，搵個人陪跑都冇。喺毫無競爭氣氛之下嘅特首選舉，本港傳媒花唔少篇幅報道崔世安家族嘅來頭，八方最近都有了解過崔家嘅生意版圖，發現咗兩個涉及香港嘅名字。
免競投獲批地王
崔世安哥哥崔世昌曾經出任過「澳門主題公園渡假村股份有限公司」董事，根據澳門商業及動產登記局資料，呢間公司2004年4月成立，資本1,000萬澳門元。06年1月，澳門前運輸工務司司長歐文龍以免除公開競投方式批出一幅10萬平方米嘅土地畀呢間公司。
呢幅地喺正「澳門蛋」對面，話係用嚟起四星級酒店，隔籬仲會起主題公園，不過家都未見動土。崔世昌當年以公司董事身份成功取得呢幅地王之後，去年5月終止職務。同一時期，公司董事局成員多咗兩個名字，分別係林順泉同林順財。
林順財曾任東方報業執行董事，林順泉則係東方報業集團行政總裁，根據年報，其年薪差不多300萬元。