新世界中國（917）相對近磅內房股，NAV折讓吸引力彈出，炒落後，買新中。新中最近兩個月，股價好似點穴點咁，郁都唔郁，現價（4.56元）相對NAV7.80元，折讓近42%。同新中市值（174億銀）差唔多嘅有中渝置地（1224，市值129億銀），股價啱啱喺上星期五創1年新高，現價PB係1.3倍。又新中股東應佔權益299億銀，同龍頭中國海外（688，市值332億銀）差無幾。後邊中國海外，最新PB講緊4倍水位，新中落後幾十條街。
新中喺內地土儲上2000萬平方米，唔係嘢少。係咁意計數，以每方米未來每升值500蚊（只係每方呎46蚊）計，額外升值已經講緊上百億銀（亦即每股增值2.60元），新中土儲「晒士」充足，潛在升值能力，係非常可觀。買新中，博再翻半番到6.84元，新中相對重估前NAV，仲係講緊有折讓，相對近磅股PB，亦係差好多條街。
麗豐折讓大潛力厚
麗豐控股（1125）亦喺高位牛皮個幾月，另一隻落後內房股。麗豐最新NAV0.86元，現價（0.248元）折讓高達71%，唔計任何資產重估，呢個折讓，已經叫人流口水。再講，集團手頭土儲過千萬平方呎，亦唔係少嘢，喺廣州多個商業或住宅項目，將喺嚟緊呢一兩年陸續落成，食住祖國新一輪樓市升值潮，麗豐NAV又唔係咁計數。一樣博麗豐翻半番到0.37元，相對重估前NAV，折讓仲高企56%，麗豐仍然好吸引。
錢雋