香港久未有禽流感個案，可能擔心相關人員殺雞技術生疏，漁護署前日搞咗壇代號「洋紫荊」嘅殺雞演習，召集100人去打鼓嶺行動中心扮殺雞。演習過程認真，有指揮中心同兩個模擬農場，又做足調配人員物資程序，所有人着晒生化保護衣物，美中不足係演習時大家只係劏空氣，並冇用真雞大開殺戒。
雖然只係假殺雞，但據講參「演」人員好認真，扮捉雞時一絲不苟，將「雞」（即係空氣）放入黑膠袋後，再注入真正二氧化碳殺雞先收得工。漁護署話演習係要員工重溫殺雞程序，包括穿着保護衣、消毒同處理家禽屍體方法，所以唔需要用真雞。做戲做全套，模擬埋走雞場面就完美嘞。