至怕燙手山芋嘅特首煲呔，將公共廣播服務檢討放入雪櫃，香港電台前途未卜，港台節目製作人員工會聽日舉行「反陰乾遊行」，號召同事及撐港台人士着上紅衫，高舉「我要陽光，唔要陰乾」標語上街。工會前日在港台一號錄影廠開員工申訴大會，男主角係《獅子山下》開山祖師、台長黃華麒。
話說當日大會上，員工最驚係政府閂水喉陰乾港台，否則唔會遲遲唔加碼畀合約員工轉長工，又唔增加資源買數碼化器材。麒叔則以一副老行尊口吻叫大家稍安無躁，佢相信政府唔會陰乾港台，點解？麒叔開估，佢話如果真係要陰乾港台，就唔使請佢嚟做台長，是但委任一個AO空降港台就得啦！
呼籲同政府多溝通
有在場人士話，聽到麒叔咁樣反駁「陰乾論」，頓時O嘴，之後有人要求佢表態，會唔會參加聽日嘅遊行撐下屬，麒叔恃老賣老向眾人曉以大義，話同政府多啲溝通更實際，坐低傾可能仲有用，言下之意，即係話上街無補於事，又爆響口：「出嚟講一句撐撐撐撐撐好容易。」
兩年前撐港台活動誓師，當時做處長嘅朱培慶企喺港台大門口高呼「撐撐撐撐撐」聲援，麒叔卻話連講五個撐字都未必有用，明寸朱培慶。有員工同八方講，聽到麒叔咁講個心好唔舒服，港台位於獅子山下，卻已經冇咗獅子山下嗰種同舟共濟精神。
聲稱聽日約咗醫生
麒叔會上冇表明聽日會否上街，八方聽聞會後佢面有難色咁私下同人講，星期一book咗時間見醫生，至於身體有乜毛病，還是要覆診，由於係私隱，八方不宜多講，但斷估佢唔使擔心有腳痛毛病。前日由助理廣播處長戴健文傍住麒叔出席申訴大會，空降嘅AO副廣播處長梁松泰無謂自投羅網做箭靶，據聞近日放假去也，有人笑言台長、副台長閃避功夫盡得朱培慶真傳。
明天遊行隊伍由港台出發環繞廣播道一圈，返回港台解散，疑似原地踏步，八方希望唔好行完等如冇行，毫無成果啦。
mailto:[email protected]