記得上周本欄出街時，大市仍在19000樓下，筆者亦再三提出股票已入強者之手，好友力量不容小覷，轉眼之間，大市突破20000大關，很多散戶投資者望門興嘆，重見二字頭，感覺恍如隔世，雖然滿手係貨，卻都係當年蟹貨。
蟹貨無咁蟹，除了帶來一陣歡呼聲，亦令投資者想起大戶目標價，早前有大孖沙為投資者定下投資策略，認為當大市升到20000點，就應該套利，筆者都同意，大市踏入20000點，可能係唔少投資者的鬆綁價，有機會引來一陣沽壓，而且大市用了兩周就升3000點，出現回調唔出奇。
不過，大戶買賣量大，需要一定水位轉身，亦會因應市況，對投資策略作出調整，就好像早前筆者預備在17000樓下大手買貨，但大市跌到17050已經拒絕下跌，筆者唔係大戶，都識得摸着石頭過河，大戶見跌唔落會買，見升唔上一樣會沽，所以，如果大戶真係認為20000點偏高，相信未到已沽定先，但近日所見，大市狂風掃落葉式升上二萬水平，尤其係周三大市以800億大成交下跌，翌日就已經完全收復失地，市場購買力已經毋庸置疑。
所以，就算大市遇上沽壓，調整幅度應相對有限，到時反而係撈貨的好機會，但到底大市會扶搖直上，還是先作調整？老實說，士佳唔係生神仙，估唔到後市頂底，但既然已經站在大趨勢之上，筆者亦沒有太大顧慮，所以升穿19100之後，已將持倉比例提高至九成，以筆者個人來說，並唔算太多，因為牛二正是做孖展買股之時，讀者不要誤會，士佳唔係鼓勵借錢，投資一定要量力而為，不可以Overtrade，但牛市理應適當地進取一點，士佳對後市有信心。
沽騰訊換馬金山
不過，未來一段時間，雞犬皆升的市況可能暫告一段落，取而代之，是強勢好股輪流炒上，筆者近月提及過的股隻，都輪流上升，例如上月尾筆者提及過的福山能源（639），周五亦升破了近期頂，筆者仍然看好此股走勢。
除此之外，騰訊（700）在60幾蚊時，筆者曾經戲言，若半年內不上115元，就退出江湖，轉眼已升上106元，目標已近，筆者亦沒有窮追猛打，只係沽出套利，但筆者唔係睇淡，只係套利換入性質類似，但估值較低的個股，如金山軟件（3888）就係筆者近日摰愛，讀者不妨考慮，但既然大市輪流炒作，投資者要有耐性等股隻上升，唔好見升追升，跟紅頂白，基本因素好而又有技術因素配合的好股，在牛市之中，自會給予閣下理想的回報。
張士佳 筆者及客戶均持有上述股份