書展咁多優惠，買書買到大出血唔出奇，買咗返嚟掂都唔掂嘅更加唔出奇。好似小妹每逢書展都掃貨，堆到成屋書唔少未睇過，封塵唔在講，有啲仲發晒黃。早幾日小妹去到唔鍾意行街、上網，淨係愛睇書嘅老友宅女Winnie屋企食飯，見到佢頂到天花板咁高嘅特大書櫃，嘆為觀止，再見到啲書分晒size擺，本本都用透明膠紙包到靚靚，仲更加汗顏。
內頁變黃不能還原
Winnie笑笑口話，為咗令啲書保持光鮮，會不時自製「書本化妝水」，用1：3呢個比例開稀漂白水，再用棉花抹吓書邊，原本黃黃嘅書邊就會變番雪白光鮮。
Winnie沾沾自喜話，「呢個方法都唔係本本書都work㗎，通常啲書發黃係由書邊開始，之後再滲到書頁入面，如果連書頁都黃埋，點都還原唔番㗎喇。我一見啲書邊發黃，即刻就抹書救亡。」
喺咪真係work？小妹都有啲保留。即刻打畀中大生物化學系副教授陳竟明問問先。教授好權威話，呢個方法理論上係得，紙本身係纖維，氧化咗會變黃，漂白水可以將佢還原番。但其實家好多書都係用粉紙，唔會咁易變黃，亦有啲書商會用一啲冇經過漂白、黃黃哋嘅紙做書，環保好多，「紙本身就唔係白色，啲紙咁白係因為漂白過，對環境唔係幾好。」
小妹冇時間睇書，當然都冇時間抹書啦，為咗保持啲書靚靚，我已經諗到一個驚世絕橋，就係將所有書送晒畀Winnie保存，咁又可以騰出多啲位出嚟買新嘢，Yeah！
電郵：mailto:[email protected]