看見阮小儀，腦海即時浮起她主持《千奇百趣》的趣怪表情，想不到狗似主人形，愛犬DeeDee一樣表情多多，矇豬眼、舔舔脷、儍頭儍腦……當真要幾Cutie有幾Cutie。你看牠癲儍，牠真的癲儍，儍到曉得借癲納福，追女有一手，更出書教其他狗朋友追女絕技，只卻苦了主人小儀當繙譯員。
記者：蒙為亮
攝影：楊錦文
場地：Dogsidecafe（65533699）
公仔=大婆
5歲的DeeDee由細到大都很有異性緣，女孩子愛摸牠，狗女愛哄牠，全因牠夠乖無架子。
小儀每星期都帶牠到愛護動物協會上課：「想狗仔聽教聽話，一定要有適當訓練，我每星期都會帶DeeDee上狗隻行為訓練班，上過堂，狗仔會比較友善同Friendly一啲，至少唔會怕陌生人，亦唔會怕其他大狗，狗仔對未認知事物會表現得好驚青，所以有上課必要，不過DeeDee上堂為次，媾女為實。」初上訓練班，DeeDee早已散播情種，女主角是隻牧羊狗，兩狗一見鍾情，DeeDee還親暱到伸脷舔人家的心口毛，牠多情，不懂專一，得一就想二三四五六七，一見其他狗女就擠眉弄眼，表情，竟有點像初出道的伸脷Edison。
小儀大讚牠裝可愛追女仔有一手：「正因為DeeDee脷功了得，所以我幫佢出書記低情史，希望同其他電車狗仔分享絕招，DeeDee最叻Chok個伸脷得戚冧女樣，連吳日言愛犬WinWin、DJ朱薰愛吠妹頭都被佢迷得一陣陣。我無特登搞佢擺舔脷Pose㗎，由我第一日養佢開始，佢已經識得舔脷，我問過獸醫，獸醫話吐舌動作唔影響健康，但老咗可能會出現脷乾問題，所以我都開始訓練佢唔好再伸脷引狗女。」每晚小儀工作後回家，DeeDee都會以九秒九速度飛撲埋身，獻上濕吻一個，又喜歡吮其他家庭成員腳趾，說着說着，越發覺DeeDee是隻好色狗，偏偏，牠在1歲已進行絕育手術，「佢係隻單蛋蛋狗，進行絕育手術全為佢健康着想，嗰陣佢Down足一個月，我醒呀，買隻PaulFrank毛公仔畀佢，佢竟然對呢個『Mary』色心起，搞到隻公仔殘殘破破，所以我成日都話，隻公仔係佢大婆，其他狗女，不過係偷食目標。」
人立：
用後肢站立，熱情伸出雙手，作抱抱狀。
Chok樣：
眈天望地，扮型擺款。
伸脷：
有「饒舌狗王」美譽，舌頭長到差點舔到自己的眼睛。
細狗≠頑皮
這幾年每逢出Trip，小儀都放心不下DeeDee，一怕牠離家出走識女仔，二怕牠的友善性格招惹無妄之災。話說有次DeeDee太好動，幾乎斷送狗命，「佢太鍾意同人玩嘞，有次差啲玩出個禍來，嗰陣佢剛剛3歲，我帶佢去沙灘，佢想同個外國人玩，點知外國人身邊隻大唐狗以為DeeDee想攻擊佢主人，護主心切一口咬實DeeDee條頸，仲成隻擔起，好彩無即場斷頸。初初我不以為意，點知返到屋企同佢冲凉，冲到成地血水，佢條頸有兩個俾吸血殭屍咬過咁款嘅傷口，嗰陣我幾驚以後再見唔到佢。」
別看DeeDee一副公子哥兒油頭粉面模樣，牠可是捱得之狗，「嗰陣我每晚同佢敷藥，因屬內傷，醫生吩咐我每次都要整番損結咗焦嘅傷口再搽藥，咁先可以從內好到外。我知DeeDee一定好痛，但佢每次都乖乖敷藥。」說到這裏，DeeDee好像聽懂人話，又伸頸吻小儀一下，「我想借機會同細狗平反，好多狗主投訴細狗好嘈，尤其芝娃娃，但我完全唔覺得係咁，關鍵在主人懂唔懂得教，如果唔教，大狗都可以好頑皮，我朋友隻金毛就完全失控，見到其他狗同人都照擒，又亂走亂吠，所以養不教，絕對係主人之過。」
相睇=得啖笑
初初養狗，小儀想養長毛臘腸狗，「可能崇日，我自小就有個心願，想養三至四隻長毛臘腸狗一齊去表參道大暴走，諗落都覺得型！自從養咗DeeDee，呢個念頭打消咗，就算家叫我養多隻狗，我應該都會養芝娃娃。」有想過為牠成家立室嗎？「生仔無可能啦，因為佢已經絕育，之前試過一次相睇，希望幫佢搵個伴，場面好搞笑，女家都係隻芝娃娃，但非常大女人，一見到DeeDee就想咬佢，搞到DeeDee望多眼都唔願，索性背住佢，睬都唔睬佢。我會繼續同佢搵個伴，有時我唔喺屋企，佢會好孤獨，好似保良局孤兒一樣咁慘，有得揀，我每次旅行都會帶埋佢去。」
狗仔去旅行手續繁複，花錢事小，打針、申請等需花大量時間，「點都好，我一定會帶DeeDee去一次旅行，去邊？應該係日本啩，佢已經係我命根，今次幫佢出書，除咗做善事將收益捐畀愛護動護協會外，更想藉呢次機會用文字同相片，記錄低我同佢嘅快樂日子。」對，狗與人一樣，總有一天會離開塵世，趁在生，還是盡快留下美好回憶吧，「呢個問題我不時都有諗，我暫時無諗過用另一隻狗Replace佢。」談至此，平時鬼馬的小儀，竟收起一貫的輕佻，眼神帶點無奈，面對生死，我們都是無能為力，還是抓緊眼前，與寶貝狗及時行樂才是硬道理。
Snapshot
