影城亂射　濕身芝麻街

當書展變成o靚模節，我有一個更適合o靚模們玩水showoff的地方──日本環球影城。34℃烈日下，影城的暑期新節目「夏日街頭水派對」就最啱o靚模用水槍互相廝殺！加上少女最愛的HelloKitty、芝麻街BigBird等全部濕身玩埋一份，超開心！仲着雨褸？着住泳衣踢住拖來玩吧！

記者、攝影：吳允冲
鳴謝：UniversalStudiosJapan、ANA

BigBird變落湯雞

在紐約區未來戰士2:3-D前的街道前，每日都有2-3回的「夏日街頭水派對」，在街頭掀起激烈水戰。一輪蓮步舞熱身後，瘋狂的戰況正式開始！眼見日本小朋友確實心狠手辣，亂槍掃射無辜觀眾，我也奮力加入戰團，衝去買了一把水槍迎戰！冷不防一大盆冷水兜頭淋，幸好相機和DV已做好保護，不然早已告吹。不只小朋友玩到除晒衫只着泳衣，連HelloKitty同DearDaniel都換上夏老威作戰，可憐周身毛無衫着的BigBird渾身濕透成落湯雞，Snoopy和CharlieBrown也只有捱「射」的份兒。High到爆的dancers出動水槍、水盆、花灑，走過的都無一倖免……20分鐘後我已經由頭濕到落腳，邊行邊滴水，慘嗎？不知幾爽！

■一盆冷水照頭淋，圍觀者無人倖免。

■慘遭小朋友圍剿的哥哥，壯烈犧牲了。

■HelloKitty同DearDaniel換上夏老威迎戰。

街頭勁歌熱舞

只嘆現今的小孩都成熟得太快，男孩不再沉迷芝麻街，迷戀的只是Dcupo靚模。來一次環球影城尋回失落已久的童真吧！「芝麻街魔法飛毯」由一眾由細睇到大的芝麻街角色擔綱，每日兩至四次在紐約區街頭上演。BigBird、CookieMonster、Elmo等大演歌舞，勾起我兒時睇芝麻街學英文的回憶。眼見一個Elmo樣Tinkerbell裝束的新角色，原來是粉紅色見習仙子Abby，居然同老麥小飛飛餅印一樣！本來沒甚興趣的我，也開始跟她一齊跳、一齊唱歌玩「凌波微步」，尋回失落二十幾年的童真。我難得投入，身邊同行卻說：「你睇吓個dancer跳BreakDance好有型好似V6………」她看得入神，我就跳到身水身汗，不如去儍豹PinkCafé吃杯夏日雪沙冰，粉紅色草莓冰，連壯男吃下去也變卡娃兒。唔夠飽？去埋KWBB餐廳吃新推出的自助餐，主打美式食物，卻發現有中式蝦米粉絲，簡直十個珍！

■Namie&Kyoko：「我哋好鍾意Elmo，專程嚟睇芝麻街魔法市場。」

■PinkCafé雜果粉紅刨冰700日圓（$57）（左）、粉紅刨冰連杯550日圓（$45）

■Snoopy杯麪900日圓/1盒4個（$73）

■芝麻街Elmo沙灘袋1,500日圓（$123）

E.T.回歸

數環球影城中我最喜愛的遊戲，是經典的E.T.Adventure，與E.T.在空中踩單車。可惜5月時E.T.已跟大家說拜拜，令一眾粉絲非常失望。幸好，徇眾要求，7月E.T.終於回歸，雖然由踩單車變成由腳行，但E.T.還是依舊可愛。在「E.T.星際歷險傳說」中，由E.T.降落的森林，再行到外星海底世界，雖然只是短短的路程，但E.T.迷可見到不同造型的E.T.，仲可以同佢合照，都心滿意足了。不過E.T.隨時要返屋企，此遊戲絕對是期間限定！

■ET終於回歸喇！

閃燈巡遊

早上見到、史諾比、Elmo等着住夏老威發狂玩水，夜晚即刻化身閃燈人物，個個穿着Swarovski的水晶服巡遊，令人驚艷！一到晚上8點半，影城燈一關，就是37台LED閃燈卡通人物造型花車出場的時候，「魔幻星光大巡遊」除了HelloKitty、史諾比、芝麻街Elmo花車外，還有以愛麗絲夢遊仙境、一千零一夜、灰姑娘為主題的流動花車逐一登場，那種迷幻及置身仙境的感覺，令人久久難忘。高潮過後，仲可以同迷你閃燈Kitty影張合照，Kitty迷實冧死了。