回憶總是美好的，不過卻未必值錢。政壇元老李鵬飛縱橫江湖幾十年，殖民地時代首任行政局首席議員，一手創辦自由黨，政治生涯高峯期穿梭京港，為中、英、港三方做密使；飛哥五年前出版回憶錄，回顧過去30年香港政壇大事，平裝版賣50蚊，八方噚日喺書展赫然發現飛哥著作放在5蚊書買一送一特價區大賤賣，幾十年心血大貶值至兩元五角！
飛哥回憶錄賣2.5元
八方早就睇過飛哥回憶錄，可能有人認為爆料唔夠多，不過都披露唔少政壇內幕，不少圈中人都要睇完本書，先對當年事件來龍去脈恍然大悟，估唔到呢本書如今淪落到半賣半送，平均兩個半一本。書展熱賣嘅Angelababy寫真集標價128蚊，寫真集多肉少字賣到斷市，加印又加印，一本等於51本飛哥回憶錄另加五毫子。飛哥嘔心瀝血賣文，都及不上一個十幾廿歲o靚模搔首弄姿吸引，看來香港人真係只愛睇肉，不愛看字。
八方問在場出版社人員點解賤賣飛哥心血，佢哋坦言本書出版多年，舊書唔值錢，與其存倉阻地方，不如劈價大傾銷，總之賣得一本得一本，搵得一蚊得一蚊咁話，其他政治書、倉底貨都係如此下場，並非只有飛哥咁唔好彩。
飛哥近年笑傲江湖，逍遙自在，相信對回憶錄大平賣唔放在心上，佢噚日仲同八方講笑，話早前應泛民邀請去香港會做「政改武林大會」主持人，點知鬧出笑話。話說武林大會消息通天後，即時觸動阿爺神經線，唔少北京人士紛紛來電，關心佢是否重出江湖「升呢」做泛民總舵主，日後係咪以「共主」身份領導泛民同北京周旋。
北京搞錯泛民舵主
對於呢啲猜測，飛哥話真係唔知就嚇死，知就笑死，事關當日佢純粹客串性質應邀主持會議，講白啲即係做司儀，角色等如獎門人曾志偉，當然佢都有講吓對政改意見，但絕非總舵主，可能大陸官場文化認為主持會議者即係話事人，所以佢做司儀先會令上面啲人咁緊張。泛民素來一盤散沙散過蛋散，邊有咁易推舉一個總舵主吖！
mailto:[email protected]