喺新加坡同阿鳳Hea咗幾日，返嚟香港又再搏殺搵番啲旅費。牢騷王話呢排打完風，天氣熱到PK，好多怕熱客唔等巴士，直接令的士同小巴生意都好咗。不過佢嘮叨性格不變，乘機捉住我吐苦水，「噚日俾個OL激鬼死，由調景嶺去廣田商場，照計都係行將軍澳隧道出，點知佢話行澳景路近啲，即係要入維景灣畔條私家路啦，佢又無住戶證，話唔得佢又唔信，結果入到去都要原路出番嚟。」呢啲麻煩客我都遇唔少，有次就試過由彩明苑去翠林，個客係都要穿過靈實醫院轉寶琳路，最麻煩係要落地行去詢問處換出閘飛，又擔心唔知個客會唔會搞架車，咁大陣仗只係為咗支旗跳少一次。雖然即使麻煩，我一般都會按客人指定嘅路線行，其實遇着客人要求行私家路，司機都有權拒絕，點都唔算兜路。
文：黃師傅