今年書展o靚模橫行，惹起愛書人非議，退休高官陳太都睇唔過眼，噚日喺自己個blog度話貿發局舉辦書展20年，佢一直以為書展目的係推廣閱讀文化，不過今年先知道事實可能唔係咁。佢話o靚模寫真集「近乎色情刊物」，根本唔係「書」，言下之意，似乎批評緊部份出版商掛名賣書，實際賣肉。
陳太又認為吹捧o靚模寫真之風不可長，唔少年輕人不懂判斷是非，排隊花大筆金錢購買呢啲刊物，佢希望家長多留意子女去書展其實係買啲乜嘢返屋企，唔好咁放心以為行書展一定係有益身心活動。陳太指貿發局應公開說明書展目標同挑選參展商準則，唔好任由人肉橫流。
另一退休女高官李麗娟噚日出席一個公開場合時話，都有留意到o靚模寫真呢個新興潮流，不過佢冇打算亦冇興趣睇呢啲寫真集，市民是否接受，佢話講到底都係要睇o靚模有冇實力，否則只係霎眼嬌。