創辦中國會同上海灘嘅鄧永鏘可能樹大招風，英國傳媒報道，保育團體投訴鄧爵士旗下酒家賣魚翅，被揭發後聲稱三個月前已從善如流停售，但原來停售安排只限於倫敦分店，香港店「港島廳」（IslandTang）繼續有魚翅款客，善待動物組織批評鄧永鏘行為偽善。
鄧爵士不甘示弱，表示已聽取意見唔賣魚翅，又指保育團體做法令人厭惡，因為組織聲言如果佢唔解釋清楚賣魚翅安排，就會向傳媒爆大鑊令佢出醜，鄧爵士斥責咁做形同勒索，十分冇品。
港島廳去年9月開張，位於皇后大道中嘉軒廣場，每位平均消費約500蚊，根據酒家網頁，餐牌有10款魚翅菜式。