無綫新劇《烈火雄心3》由拍攝開始已經燒出幾把火，兩位男主角鄭嘉穎王喜由被傳鬥冧高層爭戲份，鬥到在片場面左左，火勢一發不可收拾。劇集出街，網民對王喜有讚冇彈，嘉穎卻慘遭狂插冇演技兼戴錯帽。是非傳來傳去，女主角胡杏兒全程隱形。第N次講與王喜不和，嘉穎說，與王喜做不到朋友。「發生幾多是非都好，點都唔好影響我嘅工作。」未知杏兒可有同感？ 撰文：何慧斯
對鄭嘉穎重提與王喜的不和事件，難得他自己亦忍不住笑說：「呢部劇好難唔記得，喺生理同心理上都歷歷在目，嗰陣我上齊晒啲周刊㗎！今次唔單止係入行以嚟，仲係我嘅人生最多㖭！人嘅意志力真係好重要，當時我成日都提醒自己，就算發生幾多是非都好，點都唔好影響我嘅工作，雖然咁做真係唔簡單，但係一定要做到。」
日日開工日日煩
經歷過磨練後，嘉穎表示現階段仍未到化境，不過EQ的確高了很多，更學會了不再執着，問他當時怎樣紓緩這種壓力時，他說；「唔開心係好正常，嗰陣真係好煩，又要開工，日日都有新嘢纏繞，雖然當時可以真正幫到我嘅人，只有我自己，不過我都會搵啲朋友傾偈，當係紓緩咁呻吓，大家會討論當時嘅情況係點，我要集中精神做啲乜嘢，反正無論點都控制唔到，不如擺埋一邊唔好理住，做咗啲可以控制到嘅嘢先，點都要撐住做好工作先。」
繼續追問嘉穎的是非問題，他傾訴的朋友當中，有否包括王喜在內，他說：「拍完戲之後我冇見過佢，其實我之前都講過，唔係個個同事都可以做到朋友，有啲同事只係同事，阿喜同我就係同事關係，一個普通同事，我係唔會有乜嘢同佢呻，我只係會搵身邊嘅朋友呻，每個人都會遇到唔開心嘅時候，我只係嗰段時間，家過咗就OK。」
從不踢阿佘落車
嘉穎口中所講的「歷歷在目」，當然亦包括拍攝時所付出的汗水，他說：「呢部劇舊年年中開拍，用咗5個月時間去拍，成個過程都記得好清楚，我哋一班同事拍嗰陣經歷晒好熱同唔熱嘅天氣，雖則我拍過《烈火2》，但做消防員嘅嘢好多都唔記得，加上又話我係冰上曲棍球高手，可惜我冇咁嘅時間，如果唔係應該係學咗一排先至去拍會好好多，事實上，如果有多啲時間去做呢部劇嘅預備工夫，我覺得會仲好啲。」
除了與王喜的是非，嘉穎和佘詩曼的緋聞也頻頻見報，日前兩人被影到同車，但報道卻指嘉穎見記者追訪即踢阿佘落車。嘉穎前晚拍MV時開腔回應：「朋友坐車好正常，我揸車咁多年從來冇踢過人落車，有上車就有落車，佢哋鍾意點寫就點寫。」
賢良淑德考杏兒
這邊廂鄭嘉穎對是非緋聞耍手擰頭，那邊廂與鄭嘉穎和王喜發展三角戀的胡杏兒卻笑看風雲變，她笑說：「雖然拍嗰陣見到佢哋真係辛苦，不過我自己都好想好似佢哋咁，但係佢哋個個都話我會頂唔順，因為真係好辛苦，不過我自己都覺得好可惜。」提到今次的角色，杏兒竟然覺得有難度，她說：「我飾演個角色好溫柔又賢良淑德，同我本身係好天淵之別，真係有啲考起我。」
攝影：陳志嵐
場地提供：TheContinentalClubGatewayHotel
髮型：KelofHHSalon（胡杏兒）
服裝：TedBaker（鄭嘉穎）