打小人，唔一定喺天氣回暖，春雷震響嘅驚蟄，小人衣紙、金銀衣紙、香燭、豆腐、芽菜、白飯、米酒，仲有肥豬肉，你準備晒未？得嘅話，準備一齊去鵝頸橋底打小人。如果搞個英超第一契弟，或者第一小人嘅選舉，肯定好多人投艾殊利高爾（A高爾）一票，佢格衰、口臭又忘本，罪行罄竹難書，日前口口聲聲話希望曼城取代自己母會阿仙奴嘅「4哥」位置，仲唔係反骨仔中嘅極品？
唱衰母會兵工廠冇前4
呢個英格蘭國腳左閘當年背叛阿仙奴，投向同市死敵車路士懷抱，所謂人望高處，唔怪佢；但佢寧願為曼城打氣，而唔鼓勵前效球會，呢條數點計？「曼城今季買咗好幾個夠份量嘅人，夠份量踢歐聯囉。」「我有好多老友踢緊曼城喎。」我唔知看官滿唔滿意A高爾呢啲答案，我就唔滿意，反骨呢第一條罪打唔甩。好，打人（小人）之前，即管再數埋佢其他罪狀，等佢俾人打小人之前都得個明白。
第二條罪：口臭。就算我唔係佢個歌星老婆雪露（CherylTweedy），同佢冇嘴對嘴都聞到佢口臭，佢周不時向人放暗箭、挑撥是非或傷害人，講反骨，當年由熱刺投阿仙奴嘅蘇甘保一樣衰，但你幾時聽過蘇甘保講過熱刺半句不是？第三條罪：淫賤不能移。明明有個令萬千男士流晒口水嘅索老婆，仲曾經死去偷食。第四條罪：浮誇，明知自己個底花晒，年前硬要搵個老婆出嚟大方影相晒幸福，呢一招，同本港某娛樂圈賤男係如出一轍。
妒忌曼城兵人工高
好啦，第五條罪，亦相信係導致佢今次反骨踩母會嘅原因：妒忌。布歷治加盟曼城後，好輕易得到8萬鎊（約103萬港元）周薪，當年曼城斟過A高爾，佢今次咁講擺明想向曼城獻媚，畀埋布歷治個左閘位佢踢好唔好？收到風，曼城出月薪100萬鎊利誘泰利，泰利堅持留喺車仔，大家都係踢車路士啫，點解人格可以差咁遠？