有個女友人移咗民幾年，最近回流返嚟。早幾日幾個老友出來High-tea，講開揸車，女友人即時心癢癢話好耐無喺香港飛過車，大家即時起哄反對，話晒唔再係十八廿二，邊得嚟飛車，享受吓駕駛樂都仲講得通，又或者話回味一下人多車多、爭路多燈勁擠塞嘅香港路面情況又得。講多兩講，大家就話坐言起行，女友人坐到落駕駛席，至諗起車牌可能過咗期，一睇之下，佢個牌喺四年前已到期。大姨媽我二話不說即時換位啦。法例規定，駕駛執照有效期滿之前四個月內就要續期，如果過期超過三年就已經無得續牌，再要番個正式駕駛執照咩？得，再重新考過囉！各位公私兩忙嘅失魂魚，仲唔快啲Check吓個牌！
文：大姨媽