長毛噚日下午忽然好緊張，發散人幫佢搵隨身帶住個黑色背囊，因為個背囊唔見咗，幾個鐘頭後，佢發出聲明話已在商台播音室尋回，原來佢大頭蝦將背囊遺下商台，好彩搵得番，虛驚一場。
八方奇怪點解咁緊張，長毛話背囊入面雖無個人貴重物品，卻有幾份梁展文聆訊同雷曼小組機密文件，如果遺失，要報警兼向立法會秘書處解釋，十分麻煩，因此佢咁緊張，就算唔見咗銀包都冇咁驚。據長毛講，除文件外，背囊內最重要嘅物件係一本寫滿各地朋友聯絡方法嘅記事簿，若果唔見咗，等同失散多年朋友，好陰功。
長毛自言近日精神差，所以咁失魂，佢都經常唔見嘢，最經典係在維也納遺失特區護照，要去中國領事館補領。