中共建政60周年，本港親中政團大鑼大鼓組成籌委會舉辦多項慶祝活動，籌委會名單星光熠熠，名譽主席包括第一、二支管治隊伍領導人煲呔同中聯辦主任彭清華，主席團主席有全國政協副主席董建華同人大常委范太，梁振英CY都有份，為參選特首熱身嘅佢果真無處不在。
鬍鬚曾冇份搞國慶
另一特首大熱唐公子都唔失禮，同中聯辦副主任李剛、黎桂康等人一齊擔任主席團顧問，兩位局長林瑞麟、曾德成都係主席團顧問，反而另一位特首黑馬鬍鬚曾卻影都唔見。雖然呢啲顧問只係掛名，但排名絕對有分先後，身為財政司司長竟然榜上無名，鬍鬚曾在親中政圈算老幾，可見一斑。特首候選人若無左派力撐，等同未開跑已經落後大半個圈，難怪唔少人竊竊私語鬍鬚曾已經墮馬。
煲呔上星期去睇黎明演唱會，原來CY都有同太太去捧場，仲去後台探班兼夾將同黎天王嘅合照放上網誌。CY大讚香港演藝界人才鼎盛，香港藝人處處有fans，似乎演藝界係佢開拓選票嘅處女地。