財務A二十年前移民加拿大，攞到加拿大護照後立即回流，返得快，好世界，近十年已係跨國公司亞太區高層，經常往返中國主要大城市，北京上海去得最多，照計來往如此頻繁，攞張回鄉證就最好，但財務A堅持用加拿大護照申請多次簽證，平時冇乜事，好似去年北京奧運期間咁，中國突然收緊外國人簽證，財務A就遇上麻煩，我哋班老友笑佢笨，僵硬，唔攞回鄉證，等於攞苦嚟辛。
近日發生澳洲力拓間諜事件，財務A對住我哋，突然笑起嚟，講一句：「明白未？」諗深一層就明白啦，財務A並非幸災樂禍，佢自己都驚驚哋，恐怕有朝一日，自己會變成胡士泰。財務A話：「胡士泰被拘留，你哋個個知啦，請問其他三位同時被捕嘅力拓員工，姓甚名誰？」大家為之口啞啞，真係唔知噃。財務A嘆一聲：「胡士泰因為入咗澳洲籍，持澳洲護照，所以澳洲嘅上海領事關心，澳洲外交部關心，澳洲總理都關注埋，力拓開始聲大大，企硬否認間諜之說。但冇人問起，冇傳媒報道，世人幾乎遺忘嘅，係嗰三位力拓嘅中國籍僱員。你話呢三位假如亦係有澳洲護照嘅，佢哋嘅命運會唔會好啲呢？」
唉！中國人就係咁，難怪不少人拚命移民，爭外國護照，連高幹子弟，京城大官嘅子孫亦係如此。涉及力拓間諜案之四位力拓僱員，除咗上海辦事處總經理胡士泰家聞名世界之外，翻查幾張報紙，卒之搵到其他三位係經理劉才魁、員工王勇、葛民強。力拓已發表聲明會「支持四名員工，相信他們行為正直誠實，符合公司之嚴謹道德操守」。跟住力拓已撤走部份駐中國員工，唔通預備與中國打一場硬仗？
據報道，胡士泰係天津人，北大畢業，好識做公關，經常與中國大小鋼鐵廠往來，京奧時組團邀請鋼鐵企業高層到北京觀賞賽事，晚上請女歌手獻唱。財務A睇完報紙，又嘆一聲，「呢類事情那一間外國大企業嘅駐中國代表不曾經歷過？食飯聽歌之際，梗係互通消息啦，唔係點向公司交差呀？如果咁就係涉嫌間諜與賄賂行為，所有外資駐中國代表都死得咯！」大家都唔識胡士泰，唔敢評彈，中國嘅國家機密定義，甚為鬆散，將來要有確實證據，方能服眾。