應采兒近日為電影《功夫廚神》宣傳，其角色跟現實中的她一樣：出得廳堂但入不得廚房。應采兒表示希望將來老公廚藝了得，可惜男友陳小春的廚藝同樣見不得人，但她依然力撐男友還有其他更好的優點。
應采兒最近與洪金寶和吳建豪合作拍攝電影《功夫廚神》，她自言沒有動作打鬥場面出現，她說：「戲中我有個妹妹，因為講我爹哋過身之後，我哋兩個相依為命，去經營一間中式餐館，偶然機會下飾演廚神嘅洪金寶嚟咗我哋間餐廳。」
應采兒表示於片中主要演花瓶角色，她說：「你一睇我就知我係靚女，所以今次做花瓶啦，我又唔使煮嘢食，主要係用個鼻去聞。」
「將來叫老公煮」
應采兒直認自己廚藝完全見不得人，她說：「我鍾意人哋煮嘢畀我食多啲，平時都係爹哋煮畀我哋食，將來結婚都會叫老公煮，我媽咪都唔係好識煮嘢食。」
當問到男友陳小春廚藝是否了得時，她坦言小春跟她一樣，雖然之前口口聲聲表示希望將來老公懂下廚，但對於小春廚藝水皮，她力撐說：「佢冇我咁鍾意食嘢㗎，唔一定要識煮，第二啲嘢OK咪得囉，好似搵到錢、保護我同愛我。」她表示雖然自己廚藝麻麻，但也曾為男友下廚，問到小春吃完後有何反應時，采兒說：「佢梗係話好味啦！」
洪金寶教整青瓜
對於首次與洪金寶合作，應采兒表示口福不淺，她說：「大哥好得意，佢唔係食好多嘢，不過就會買好多嘢畀我哋食，所以大家一得閒就不停咁食，而且佢又教我整酸辣青瓜，因為我都好鍾意食辣嘢。」
採訪：王崇穎 攝影：陳志嵐
場地提供：板長壽司
化妝：SynniTamofIFCPrivateISalon
髮型：EdmondLeungofIFCPrivateISalon