譚詠麟、陳奕迅（Eason）、任賢齊同李克勤噚日出席喺大球場舉行嘅「香港2009東亞運動會100日倒數及火炬傳遞」記招，四位歌手都會擔任火炬手，Eason喺台上話能夠推動運動會覺得好高興，仲話細個時好鍾意踩BMX，阿倫即刻取笑佢話：「嘩！踩單車好危險，你所餘無幾。」Eason就反駁：「咁可以戴保護罩㗎嘛。」
阿倫同克勤對於冇咗健美項目覺得好可惜，阿倫好抵死咁話：「家啲人都轉咗，淨係睇女性胸肌，噚日（前日）日全食，啲o靚模趁機襲地球。」問阿倫係咪都有留意o靚模群攻書展，阿倫話：「有得唔留意咩？我覺得o靚模係分開幾個階段，有o靚模同乳模，乳模入邊又分開有模同冇模。」
「搵番個模主席」
乜嘢叫有模同冇模呀？阿倫解釋：「有模即係有model嘅形態，冇模即係冇形態囉，到咗佢哋大啲就變中模，靚嘅就係中模艷，唔靚嘅就係豬中模，即係豬扒，老啲仲做model就變咗老模，佢哋有咁多模，應該搵番個主席做模主席。」
不過阿倫轉頭又話o靚模騷胸無可厚非，又唔係殺人放火，有啲係真材實料，都係攞啲嘢出嚟賣推銷吓搵啖飯食，佢仲話人哋冇依冇靠冇衫着，唔好成日話人性感喎，應該鼓勵吓人。問佢對邊個o靚模最有印象？阿倫話：「我講唔出名喎，邊個叫你哋（指記者）篤佢個胸嗰個囉。」哦！即係周秀娜啦！
