皇馬真係俾荷蘭前鋒亨特拉爾玩謝。事緣皇馬應承將亨特拉爾以1,800萬歐元（約2億港元）賣俾史特加，仲特登唔使佢去愛爾蘭集訓，留喺西班牙傾個人條件。呢單交易頭尾搞咗兩個禮拜，原本傾得七七八八，點知亨特拉爾臨門一腳唔肯簽史特加，搞到皇馬見財化水。聽聞亨特拉爾想去英超，但有傳對佢有興趣嘅阿仙奴同熱刺遲遲唔出手。皇馬雖則暫時甩唔到亨特拉爾，但仍財來自有方，據講皇馬為咗開拓中國市場，會喺今年12月22日主場同中國國家隊或球會打友賽。如果係真，中國球員都有機會向C朗等球星學嘢，真係要好好把握。