轆Book：長測GS450h　午夜繼續藍天

藍天行動令所有混能車即減牌費，但仍有人對Hybrid有保留，認為又貴又無力。當你對住架凌志GS450h四日三夜後，會發覺喺極度豪華舒適下，掂住油門居然畀到你推背嘅感覺，黑漆漆嘅GS夜麻麻喺「屯公」發力，一路飆一路幫你慳油錢，午夜快車同藍天行動，居然出奇地夾。

記者：徐影龍
攝影：譚盈傑
Model：Fion

凌志GS450h繼承Aristo跑車血統，上一款GS300已經跑贏好多所謂辣車，想試呢架新嘅混能版好耐，今次終於有四日三夜任我舞。

■混能車都有推背感，加速力令人相當驚喜。

■6速加減波，疾飆再拖波入彎都好靈敏。

混能都可推背

頭兩日只喺市區小試牛刀，但短短一段環保大道，已體驗到掂吓油門都有推背嘅加速感，仲要係上緊斜依然爆住去，呢種轉數急速爬升嘅力量感，跟大cc引擎表現又唔同，邊個話Hybrid飆唔起。第三日正式拍攝，預咗玩全日，目的地係龍鼓灘，一行四人由將軍澳直入屯門公路，路線揀咗由荃灣經深井，再直入黃金海岸。經過初步熟習GS450h後，已有信心稍為加速，全程+/-波試埋波箱反應。幾個燈位起步輕易攞到有利位置，彎位由5波稍為拖番落4波，已可順利攻下，除有足夠扭力去抵抗G-Force作用力外，車架剛性都真係值得一讚。

■內櫳闊落舒服，身處其中根本察覺唔到係一架辣車。

■雖暗藏電池，但尾箱仍然擺得落一個大篋。

飆住慳油錢

唔知係沿途實在太爽太順，抑或37℃烈日當空、個個戀棧GS450h嘅舒適，無人願意落車影相，結果遊足幾粒鐘車河，直到日落西山天都黑埋先影完相，但全車四人感覺舒暢，唔會話屈到頸梗膊痛。有跑車戰鬥力兼具豪華內櫳，仲要每一腳都幫你慳到油錢。行咗幾日，大概消耗半缸油，計番路程實際耗油數字為$1.8/km，比同門其他混能型號稍高，但唔好忘記佢用電以外，仲有一副3,500cc汽油引擎，最大馬力去到三百幾匹，呢幾日玩埋速度同高轉數，兩蚊唔使真係無乜車做到。