同股壇高人閒聊，講到港股已經升過萬九點，但家陣又似回氣階段，入市選股有乜好炒呢？呢位老哥就強調要留意關乎國計民生之內需股，一來內地經濟復蘇步伐加快，民眾消費意欲自然回升。
另一個原因，是為保持民族品牌，例如為蒙牛乳業（2319）引入中糧集團變身成為國有企業，一來可防「外族」惡意收購；二來話晒有「國企」個招牌，對品質監控會做得較足。
如果內地真係要將關乎國計民生之一切食用資源掌握在手，以防外資入侵，其他相關股份或會照辦煮碗，估計雨潤食品（1068）、滙源果汁（1886）隨時掀起國家「財資勢力」入股潮。
短線睇0.48元
安德利果汁（8259）係內地最大果汁供應商之一，亦係國內首家果膠企業，理應獲得市場眷顧。最近集團與統一企業（220）於山東省組成策略合營，安德利既可藉此進入果汁市場利潤較高之下游業務，對公司未來發展有利。該股昨逆市上升4%，報0.39元，成交配合升勢，伺機買入，目標0.48元，穿0.30元止蝕。
方星俠