為咗對付金融海嘯襲擊，環球央行好齊心咁不斷以「晒冷式」奇招抵禦，海嘯源頭花旗國就更加出盡法寶，救活咗陷於水深火熱嘅金融機構，亦令股市翻生，證明聯儲局主席伯南克唔係浪得虛名，呢鋪更令佢俾投資界捧為最掂嘅財金官員。
特里謝、金默文入三甲
彭博資訊訪問咗全球1076位有份量嘅投資者，問佢哋對全球主要央行行長處理金融危機嘅睇法，結果近75%讚伯南克出色，令佢當選金融海嘯下表現最好嘅財金官員。至於歐洲央行行長特里謝同埋英倫銀行行長金默文就分別有54%同50%人讚，排第二同第三；中國人民銀行行長周小川都唔差，有42%畀個叻佢，排第四。
Euro資產管理投資經理WallaceLin覺得，伯南克可能係全球最好嘅財金官員，Liebau資產管理總裁JackLiebau更話，出年1月任期屆滿嘅伯南克若唔能夠連任，真係會嚴重拖慢全球經濟復蘇，令股市大跌。
查實喺金融海嘯之下大顯功架嘅伯南克，都唔只係投資界寵兒，政經界猛人都對佢讚不絕口，好似之前同佢一齊爭做格老接班人嘅哈佛大學經濟學教授費爾德斯坦，就出口撐佢連任，至於美國總統奧巴馬亦讚佢對付金融海嘯嘅表現理想。
李華華
mailto:[email protected]