增加馬季賽馬日，是否會增長賭風，左丁山就認為唔會。但一啲社工，宗教人士，教師就話到一定會，大家意見不同，本來冇乜好拗，但有一位議員黃成智為抗議增加賽馬日而絕食，好似大陣仗一啲噃，老友余伯樂批評黃成智「濫用絕食益增奇醜」，何以咁勞氣？原來余伯樂係新界東選民，二○○四年投長毛一票，送佢入立法會，到咗○八年，民主派在新界東告急，余伯樂以度馬嘅精神，左度右度，認為長毛梁國雄學識深厚，見識卓越，有大把知音人，可以穩陣當選，而鄭家富掛頭牌，機會好高，於是自己主觀分票，投票畀黃成智。假如黃議員只係反對增加賽馬日，評馬人余伯樂唔會嬲嘅，點知黃議員居然「為小事絕食」，余伯樂就話以後唔投佢一票咯，一於繼續支持長毛。
黃成智曾是註冊社工，競選時剛好唔係，俾人秋後算賬，未免尷尬，至於黃議員現在是否係註冊社工，左丁山唔知，冇興趣追查。有一啲社工在報紙發表文章，指增加賽馬日與增加賭風有關係，則不知有何數據支持，○八/○九年馬季嘅賽馬日數及場數，肯定多過○六/○七年馬季，記憶所及，十二年前嘅投注總額超過九百億元，而上個馬季只係超過六百億，若以總投注除以總場數（即每場平均投注額），走勢一定向下，而入場馬迷人數亦反覆向下，故此某些社工之言，不知何所見而云然？
一位社工講到賽馬與慈善捐款，指出慈善捐款應否與賽馬掛鈎，就係深層問題嘞，值得反思，呢個支援慈善嘅機制，環顧世界，似係香港獨有。香港咁多社會志願團體，聘請不少社工，而好多志願社會服務團體每年得到馬會慈善撥款捐助，真正真心反對賽馬嘅社工，理應反對僱主機構向馬會攞錢，要自食其力，另行籌款，或要求政府增加資助、津貼，總之唔要馬會嘅錢！橫掂馬會一年捐款十億元，話多唔多，話少唔少，特區政府大把儲備，每年在預算中增撥十億元畀社會志願慈善團體，完全取代馬會撥款，照計並不困難，如此一來，社工反賽馬就可以更加大聲啲！