噚日我哋體育版已報道艾歷臣將會擔任英乙諾士郡總監，當大家以為佢兜踎咩？錯嘞，呢隻老狐狸點會屈就，據講諾士郡將會為佢提供200萬鎊（約2,540萬港元）年薪，簽約5年，雖則話大概只係當年教英格蘭國家隊嘅一半，但環顧全球，有邊個領隊教第4組別聯賽球隊能夠到呢份糧？仲有喎，剛買入諾士郡嘅中東財團，即時分咗啲股份畀艾歷臣，所以話佢正宗球壇大撈家，長搵長有。
61歲嘅艾歷臣個職位叫總監，但實情係掌管晒球員買賣同埋青年軍培訓，根本就係玩晒。諾士郡目前最高薪嗰個球員，好似話周薪得1,000鎊咁大把，但有財團入主，未來總會引入啲較高質素球員爭取升班，唔怪得艾歷臣噚日接受訪問時，第一句就高調話目標係上英超：「呢個係我教波生涯一大挑戰，帶隊波上英超。」博彩公司已列呢支本來位列英乙下游嘅球隊，來季升班賠率係2.375倍。
計我話，艾歷臣今次想吸「水」之餘，順便搵隊波翻身，乘機宣傳吓自己，一季後或者已有好路數，隨時鬆人，係咪真心帶諾士郡上英超？看官自己判斷啦。