伯南克前晚喺國會作證，表示寬鬆貨幣政策會繼續維持，至於會維持幾耐，佢就暗示明年底都應該唔會變，因為就業情況仲未改善，呢番話對花旗股市有啲刺激，道指逼向9000關。
港股噚日就先升後跌，升咗咁多才跌253點，算係好濕碎，睇嚟後市仲有沽壓，不過好多人等緊低位買貨，相信跌幅有限。
和黃C輪17394：和黃（013）昨收54元，升1.1%。晏晝個市回得咁急，和黃都頂得住，應該未炒完，睇個勢短線有機會試62元，可以諗吓隻C輪17394。
隻輪現價9.9仙，2011年7月25日到期，行使價58.88元，溢價27.3%，引伸波幅42.9%，槓桿率5.4倍（有效2.9倍），正股升上62元，17394有機會見14.6仙，如果正股跌穿50元，就沽咗隻輪止蝕。
俊樺