【09書展-惡鬥升級】一直不和的鄧麗欣（Stephy）和傅穎（Theresa），昨日以黑白雙煞打扮，先後在書展搞簽名會，外抗o靚模，但暗地惡鬥，雖然獲經理人公司安排交換新書泯恩仇，其間卻零交流，Theresa的fans為撐偶像，除瘋狂買書，又在簽名會吶喊助威，替Theresa挽回不少面子，難怪最後更眼濕濕謝眾。
自餅女分割到獨立發展，鄧麗欣和傅穎鬥個不停，昨日兩女先後在書展中舉行簽名會，Stephy雖早在上午11時開始搶飲頭啖湯做第一個藝人簽名會，但論氣勢和支持者，卻給緊接的Theresa大搶風頭。為抗o靚模，Stephy前日籲宿敵Theresa聯手抗戰，昨日簽名會完結後，更與緊接的Theresa交換自己的書，但就算記者要求，二人仍是企得離行離列，全程零交流且一臉尷尬。
兩女口供唔夾
兩人的簽名會都獲金牌大風高層陳輝虹和黃柏高撐場，但森美、小儀和艾粒昨日都選擇只往支持Theresa。Stephy的fans雖有吹哨子打氣，但不及Theresa的fans打鑼吶喊，論氣勢，Theresa明顯稍勝一籌，她其後在簽名會尾聲時又忽然受fans感動眼濕濕，以淚搶鏡。
Stephy指與Theresa交換書不是刻意安排，她說：「如果今日撞到咪交換，我一早預咗本書畀佢，就算佢唔送畀我都會去買。」是否一書泯恩仇？Stephy說：「我哋冇乜恩仇，自從大家獨立發展都好少合作，各有各忙。」有指Theresa在書中爆料的圈中感情騙子，其實是Stephy緋聞男友方力申，Stephy笑說：「多謝大家幫我哋做免費宣傳，我會睇佢本書研究吓係邊個，相信佢會叫我自己諗。」Stephy表示自己不容許男友劈腿。
Theresa昨日坦認交換書是一個月前的安排，她說：「我一個月前獲通知大家喺呢度碰頭，我哋除工作，私下好少聚會。」口供跟Stephy明顯有出入。至於兩女碰面零交流，Theresa說：「可能大家心情好緊張。」再被追問書中的感情騙子是誰？她說：「我唔開名，唔想影響人，影響自己，我唔預大家會忖測，只係想寫真嘢，坦白表達自己。」但言語間暗寸死敵Stephy創作的愛情小說，Theresa說：「我寫唔到人哋嘅故事，感覺冇咁好。」對於陳輝虹揶揄Theresa書中的負心漢是幽靈，她說：「輝虹講嘢好幽默。」昨日穿短裙的Theresa自爆穿了去年受歪風吹襲掀裙底的白色阿婆底。
狂迷一掃80本
此外，fans撐偶像奇招盡出，有Theresa的fans異常大手在書展中搶購80本偶像的書，企圖左右銷量，昨日有fans更即場碌卡畀錢。
採訪：王連連
攝影：林德雄、陳志嵐