記得當年睇《肥佬教授》（TheNuttyProfessor）入面嘅肥佬教授Klump，博學多才又惹笑，所以，當李健和投身講波佬行列，自稱擔心因為坐得多、少咗運動量變肥佬，查實又有何相干？真係嘅話，我哋咪最多由和哥改稱佢做「肥和」囉，一樣咁親切。
暫攻歐聯錄播節目
「畸寶」噚日宣佈增設兩個高清頻道播歐聯、歐霸盃同埋德甲，最震撼係即時宣佈和哥將會加入講波佬行列，先以嘉賓主持身份做歐聯前瞻嘅錄播節目，「處女作」將會喺8.18播出，到時就知和哥面對鏡頭時，係唔係同踢波、教波一樣咁醒。佢自己就謙稱試鏡時表現生硬，又話驚講波坐得耐會keep唔住一身鋼鐵身形，變為肥佬喎。
老實講，莫講話和哥會繼續招攬昔日友好踢丙組波，保持運動量，就算佢將來身形真係走晒樣，我哋呢啲由細睇佢踢波睇到大、睇到老嘅忠心粉絲，肯定對佢不離不棄。當講波出色嘅老行尊一個一個咁離開，多呢位閱歷之豐堪稱「教授」嘅紅褲子撐場，肯定會提升本地講波佬嘅專業形象。
話會主動搵人噴口水
講歐聯，又點會難到佢，問到對來屆歐聯嘅睇法，佢已經滔滔不絕，譬如曼聯冇咗C朗就差啲，其他英超隊，極其量好似上屆車路士對巴塞咁死守，所以都係睇好巴塞衞冕。和哥似乎嫌自己口水唔夠多，話嚟緊同人交往會主動講多啲嘢，佢身邊嘅親友，準備睇佢狂噴口水都得啦！
講返「畸寶」呢個新聞會，官方講法係新一季西甲直播仲未有定論，但收到風，情況將會好似播意甲咁，拆散同人分，總之球迷唔使憂冇得睇C朗、美斯、卡卡幾個球王級人馬大鬥法。