書展開幕，踏入第20年。20年來，全港只有一個人，由寫書、到出版、策劃、參展，甚至搬貨收錢，樣樣做齊，就是彭志銘。
辦「次文化堂」多年，每年要靠書展現金回籠，「一命救全家」，他說平日總有街數未找，但8月一定還清，年年如是；另一方面，與TDC（貿易發展局）交手多年，對手的官僚、勢利、欺善怕惡，也沒有人比他清楚。學佛的他，平日說話少不了粗口，但說得流利而溫和，只是麻甩與麻甩溝通的潤滑劑，但一談到TDC，他就佛都有火，瞳孔放大，示範怎樣連續問候人家母親分幾鐘，不喘半口氣。
記者：何兆彬
攝影：梁細權、林栢鈞
書展直擊
全場最靚
台灣縮
彭志銘憶述：「以前書展台灣館好大，大陸佬啲攤位個個攔住晒，男嘅就去咗大富豪，女嘅去周大福，好乞我憎。」但之後劇情驟變，「又同我哋講第一年參展要點要點，但上海佬一來，佢就開條上海街畀佢。根本TDC係親大陸，當然，台灣出版業都好差。」的確，台灣出版社縮得好細，而且在Hall2的角落，不過書平有寶執。
靚女教捉棋
兒童館的人潮原來好可怕，家長們狂掃$20測驗書！為了定驚，我去找靚女教我捉棋，Pinky：「我哋啲棋由法國公司設計，呢個叫QUORIDOR，每人行一步，或攔對方一步。」都係唔明嘅，請去3F18找Pinky。
鍾祖康禁書！
前《壹周刊》副老總潘麗瓊今年搞出版社，出版包括《來生不做中國人》作者鍾祖康新作《中國你憑甚麼？》。潘：「鍾祖康的書不能進大陸，也從來沒有香港出版社敢出他的書。」
本土嘢彈起
都話本土嘢彈起！文化葫蘆第一次參展，佢哋專出本地文化書，推介有這本《香港地》攝影集，$80。
書展小爆料！
據業內人士透露，書展被人轟得多不重視版權交易，今次都做吓樣，設立「版權展」，但書展性質早已變，又沒有配套，還得另外交租，誰來傾版權了？結果反應冷淡，TDC即密密Call租戶「支持吓」，「佢話真係無人租，叫我當係休息室都支持吓喎。」
成立「讀家村」
談起TDC，彭志銘就上頭，「狗賊、X街、X家鏟」等等不絕於耳。因為書展揀位次序以Book得多位揀先，而不論Book甚麼位置，租金一樣，變相是貫徹本市的高地價政策，大出版社佔盡優勢，小出版社往往被逼到頂樓的偏僻位置。
「有乜理由彌敦道又係2萬幾，Hall2去到篤篤面壁又係2萬鬆！即係天水圍天恒邨，同你住李嘉誠隔望都係收一樣價錢。」彭說：「仲有喎，你係邊個攞得多位就邊個揀先，聯合集團攞300幾個位，仲有Discount。咁搞法我哋一定無運行。」年年去，年年嘈，終於嘈出個未來，「嘈咗好多年，3-4年前終於喺Hall1開咗一條街，共50個位，只租給1-2個位的租客。」次文化堂因為書種過千，彭馬上變通，多開一間公司「七字頭」，既租Hall1又租Hall2。
但就是因為使用兩間公司，結果今年又與TDC嗌霎。這得從今年的「讀家村」談起。
小出版社租書展，往往租到偏僻位置，「舊年如果你戇XX租一個位參加，咁咪大鑊囉。舊年係一個轉捩點，因為TDC唔開電梯畀人直上Hall2，結果上面無晒生意，我同啲小租戶講話Call埋記者，帶頭同TDC講，因為TDC班友一聽到記者就驚。見有記者，好多租戶都縮沙。」書展後，上書局鄺穎萱與彭志銘傾起，就想到要團結起來，先組成「中小企書刊業商會」，15個小商戶成立「讀家村」（當中包括賣金庸小說的明河社、勤+緣等），合租書展共60個攤位，結果團結果然是力量，他們今年就租到Hall1正中的較有利位置。「仲X好笑，因為讀家村，我唔使分開租，今年就只以『七字頭』名義租，結果TDC有個小頭目打來，話若果我今年『次文化堂』唔租，就取消我資格。跟住第二日佢又打來，來來回回話『我有一個好好的方法，就係交低$6,000零蚊，保留番個位置。』我即刻X佢，「你咩頭腦，你咁鍾意做人肉錄音機，你去跟林瑞麟啦。」
次文化堂與TDC嗌霎乃家常便飯。他說有一年次文化堂出《老鹹書》，「我哋已經好小心，有點都Burn咗佢，再加花紋。但佢話有色情成份，要收起佢，書展只可以賣一級書，即係1.1級就當二級。我哋解釋時，個主任仲走埋嚟講：『唔好同我講，我無文化嘅。』因為本來我同記者傾緊偈，結果我就叫佢同記者講。仲賤，第二日出咗報紙，有幾條友來逐頁揭我哋啲書，想從中搵問題，但搞咗成粒鐘，好彩我哋身家清白！」
「不如買白粉！」
提到與TDC的多年轇轕，彭志銘提到03年的簽名大混亂。當年因為有明星大舉進駐簽名，於是TDC要求所有作者到台上簽名，但簽名前要先買書，再離場，結果司徒華在台上等了半粒鐘都無人，發火要求回到攤位。
彭志銘：「華叔仲話要公民抗命！我當然捨命陪君子。」結果一返攤位就有讀者圍上攞簽名，而TDC員工亦聞風而至，「佢拎住張紙，話我哋違反咗規定，要Blacklist我哋，我X佢XX，即刻搣碎佢掟落佢塊面度！蔡瀾剛好經過，亦拋低四個字：『豬狗不如』。」在書展，大概很少人比彭志銘唔怕死，結果大會隻眼開隻眼閉。「其實年年都係咁，林燕妮簽咗好多年，阿虫仲畫埋畫㖭。」「另一點好重要，你書展吸引人入來的係乜嘢？係好書、作者嘛！但你成人收$25、細路收$10，你自己袋晒喎！你收咁多係咪應該分番畀我哋？」
我問他TDC非牟利，賺這麼多幹甚麼，彭扯火：「佢班友人工咁貴，林天福年薪200幾萬！」記者翻查TDC年報，財務報告內顯示08/09年度200-250萬的總裁級人數，也有三人，年薪450-500萬有一人，另加津貼。「我成日X林天福，家係邊個吸引啲人來，我哋先係老細，你應該來服侍我，但係佢樣樣都來煩你，無一樣嘢係方便人。有一年仲㷫，我咪有兩間公司，當年一間一個位，一間兩個位，拍埋一齊租，我想拆咗中間塊板佢都唔畀。喂，塊板一拆就係，拆咗我人都請少個啦。」
書展年年被批評為年宵市場，我問書展何解變成咁，「林天福話搞書展同搞食品節一樣嘛，X！如果係咁你不如賣白粉啦！每一樣嘢都有其獨特性嘛。」
「最初書展只有成人去，然後係大學生去，93年左右，開始有中學生去，到咗家，書展變咗暑期活動，個個好似去拜山咁，唔去唔舒服。你問人做乜年年九月初九要去拜山？因為已經變成咗一個本土儀式。我記得97年，新翼因為要趕住畀江澤民移交，然後就開書展，結果書展期間新翼冷氣壞咗一半，我哋員工要輪流出去唞氣，熱到狗咁，但啲遊人都唔走！」
「點解書展搞到好似騰龍墟？因為啲師奶團去掃貨，書展變咗親子活動。背後係因為香港的高地價政策，書店得700呎，放得幾多書啫。以前書店係同出版社買斷本書返來，家有回書，即係賣唔完書會回到出版社度。因為書店擺得唔耐，結果只想賣賣得嘅書，賣晒十本先攞五本。」
出書無人敢發行
做書20年。蝕的多賺的少，不過彭志銘說，近幾年好幾本書已略有微利，財經越來越穩定。印刷廠菲林廠也從來不擔心，因為每年8月，書展過後他都會找清欠數。
問彭最賺錢是那本書，他的答案毫不意外，就是《老懵董》，賣了4萬，至於《掃把頭》也賣了2萬5。「哈哈，不過之後出咗本《我愛掃把頭》太狼，印了4萬但只賣了1萬。」他說：「其實《老懵董》之前財政都開始穩定了。有本《李澤楷前傳》賺錢，杜國威的書也賺錢呀。」問他那本蝕得甘，他答：太多了。余慕雲、石琪的影話集、古德明這麼好的書都不賺錢，很可惜。但他堅持乜書都出，「我有個宗旨，就係知識無疆界。我希望次文化堂就好似一個超級市場，可以買到好X貴的紅酒，又可以買到好平的豉油。」他說，除了「劉定堅咁出書送避孕套」外，基本上他乜書都出。但因為乜書都出，特別是惹火人物如毓民、華叔等作品，會惹起不必要麻煩，「有一年有間印刷廠話唔印古德明、華叔新書，我問：係咪你個人唔妥佢呀？佢話唔係；我再問係咪政治壓力，佢又話唔係。我話咁你全部書都唔好印啦。事後知道佢原來同大陸合作，喺上面開廠。咁咪唔支持囉，好食先食，魚翅你就食！驚乜啫，我成日出入大陸都無事。」
另一次，出版《屎片醫生回憶錄》，屎片醫生者，SpinDoctor也。「本書其實係笑煲呔。一般我哋做法都係書展先賣一輪，然後發畀書店，個遊戲大家都識玩。但呢本書竟然無人肯發行，甚至有人話要睇過內容先。所以今年本《狂插煲呔》，都唔使預街會有得賣，只印了4,000本。」他說：「其實出呢啲書係個態度：我哋唔要欽點的奴才。仲有樣好好笑，你曾鈺成得嘅咪寫啲好嘢來囉，你左派寫得好似吳靄儀咁好，我實出。」
往年（相片由彭志銘提）
1990年
首屆書展。那年頭參加的風頭躉都是漫畫社。「我起初不知道有書展，就寄居在文雋的創建文庫。我同佢好老友，又好感激佢，哈，結果佢年年來攞晒我哋啲新書，一毫子都唔畀。」
1991年
年輕歲月喜愛漫畫，左為利志達，中為馬榮成。彭說與牛佬最老友。
2002年
返大陸做個掃把頭面具、一個老董面具，現場替人簽名，「啲人竟然又搵佢簽噃，好搞笑。」
2003年
明星突襲書展，例如Twins，導致秩序大亂，TDC要求作者另外在台上簽名，結果華叔在台上一直等都沒人，發火說「要公民抗命」，返書展攤位照簽名。
