陳慧珊同馬德鐘繼合作《衝上雲霄》，7年後再度碰頭，即將開拍無綫新劇《搜下留情》，噚日喺將軍澳電視廣播城試造型，兩位主角比起當年成熟得多，陳慧珊產後發福仲未完全收身，好重師奶味。
「只係剪咗頭髮」
今次陳慧珊唔再做專業人士角色，反而係過氣蠱惑女，遇上飾演卧底嘅馬德鐘，馮仁昭覺得以現時陳慧珊嘅外觀，要做蠱惑女真係要加多幾錢肉緊，但馬德鐘竟然話：「覺得陳慧珊冇乜點變，只係剪短咗頭髮。」其實相比之下論外貌、身形，馬德鐘就真係keep到。
KeepFit做好準備
陳慧珊已經6年冇幫無綫拍劇，幾個月前都開始keepfit做好準備，佢話：「今次返無綫主要係檔期啱，個女都近兩歲，之前一直係我親手湊，家想佢獨立啲，囡囡都慢慢習慣我唔喺屋企。」
陳敏之噚日被刊登有男性朋友送到家門照片，佢否認係男朋友，仲話事件一個月前發生，直斥當日被陌生人跟蹤令佢受驚，曾備案求助，直至報道出街先知道跟蹤佢嘅人原來係狗仔隊。
