敏妮都諗住抽金隅（2009），但抱住買六合彩心態，所以只係抽一手。
其實用呢個「戰術」嘅散戶，最希望一人起碼有一手。不過投資銀行設分配基準時，有唔同嘅考慮。不過，有時分配基準亦都受客觀環境所影響，以金隅為例，究竟做唔做到一人一手，要睇好多因素，但首先係夠唔夠分？
單以股票行借出嘅孖展金額超過900億銀嚟計，超額倍數已經過百倍，根據分配機制，如果超額100倍或以上，就將公開發售嘅股份由9333.4萬股，增加到4.67億股。不過，抽過新股嘅都大概會知有所謂嘅「細飛」同「大飛」之分，以認購額500萬蚊嚟做分水嶺，500萬蚊樓下嘅就係「細飛」，屬甲組；相反就係「大飛」，屬乙組。4.67億股金隅新股會平均分俾呢兩組，即係每組有2.3億股，各自按認購情況分配。
一般情況底下，絕大部份散戶都只會入細飛，所以屬甲組。2.3億股即係46.7萬手貨，要一人起碼有一手，除非甲組認購人數唔多過40萬，否則都幾難一人一手。幾十萬人申請並唔誇張，記唔記得06年10月工行（1398）招股，結果有近100萬人申請。
溫敏妮
http://wanmanli.com/blogs/