花旗股市前晚繼續炒上，港股噚日高開後回吐，但尾市又抽番轉頭，最後好淡雙方算係打成平手，恒指微跌0.64點收市，睇指數變化好似冇玩過，但係炒即市隨時會被摑兩巴。
A股回落，只係唞吓氣，整固後可以再炒上。保險股走勢仲係好靚，應該未升完，如果見整固，可以收集。航運股噚日升後橫行，後市睇好。
中國遠洋C輪17220：中國遠洋（1919）昨收10.28元，跌1.3%。股價回完氣再炒上，可試12.50元，留意C輪17220，隻輪現價26.5仙，2010年3月26日到期，行使價10.68元，溢價29.6%，引伸波幅83.1%，槓桿率3.8倍（有效2.3倍）。
正股升上12.50元，17220有機會升上41.3仙，約5成半升幅，如果正股跌穿9.40元，就沽咗隻輪止蝕。
俊樺