「巨無霸」奧尼爾「大激變」！4奪NBA總冠軍嘅奧尼爾號稱自己喺籃底之下冇對手，玩籃球玩到厭嘅佢終有新搞作，就係同ABC電視台合辦一連6集，名為《ShaqVs.》嘅遊戲節目，每集奧尼爾都會越級挑戰各個體育專項嘅超級巨星，據悉奧尼爾就會同「新水怪」費斯進行游泳比拼，我求大俠就好期待身高7呎1吋、體重超過325磅嘅奧尼爾跳落泳池嘅「炸水」技術！
奧尼爾話今次構思呢個節目嘅原因，係相信大部份觀眾都想睇吓啲巨星玩其他體育活動，所以咪自07年後再次同ABC台搞「真人Show」節目，而家仲聯絡緊單車好手岩士唐玩。
先鬥匹茲堡4分衞
奧尼爾周三就會喺匹茲堡拍攝第1集，首集比拼嘅對手就係匹茲堡鋼鐵人4分衞羅斯里斯柏格，佢哋會玩7對7的傳球比拼，呢個節目會喺8月18日美國有得播，想睇身形龐大嘅奧尼爾怒跑「達陣」嘅經典場面，香港嘅球迷可能就要留意網上世界！
鬼主意多多嘅奧尼爾上得電視，當然唔會放過機會，喺觀眾面前發放「金句」啦！所以每集都會有同接受佢挑戰嘅運動明星鬥嘴片段，畀雙方喺賽前營造緊張氣氛，奧尼爾有一集會同京奧奪女子沙排金牌嘅組合姬莉華殊同美爾比拼，要奧尼爾喺沙灘上以一敵二，相信就冇咩可能，可能奧尼爾要憑「三寸不爛之舌」鬥贏呢兩位美女喇！之後，「巨無霸」亦會挑戰網球嘅莎蓮娜，以及拳擊同棒球等項目。
喺9月15日歸隊騎士嘅奧尼爾今次係好認真咁玩呢個擂台遊戲，皆因佢會喺每項挑戰之前搵個教練訓練一個禮拜，之不過奧尼爾亦表明「敢於挑戰，盡力而為」先至係節目重心，最後嘅贏輸根本唔重要，所以都會叫吓啲明星畀吓面，讓一讓賽咁話，我求大俠覺得奧尼爾呢招「以退為進」真係高明，明星級戰將又點會唔畀面你呢？