天農百部　授湊仔武功

每年書展，都會狂推新書。今年似乎充斥o靚模寫真，與其嘥精神抗議，家長們倒不如叠埋心水精選好的育兒書。古天農及馬仔同於書展推新書，前者為家長寫本育兒讀書報告，教父母睇書學湊仔，後者初為人母分享懷孕日常趣事，為書展帶來一股清流。

記者：林佩婷
攝影：梁細權、陳盛臣

古天農育兒報告

古天農對戲劇藝術有研究大家都知，想不到連育兒都有一手。只用了兩個月時間就完成標榜為父母寫的《天農百部》，結集他多年來的育兒經驗及看書心得，從中選了百多部書作再引申推介，讓父母有所依據，當中的理論他都跟兒子古浚實踐過。書中全方位講健康、品德、創意甚至文化藝術，最深刻是特地開一章講健康飲食、戒牛奶多飲水、多運動才會成績好等理據，他說是沙士時啟發出來的。「沙士時兒子曾有過感染風險，點為之健康係一門學問，普通如飲水，閒閒哋可以睇五本書，但我濃縮成一小節。」
六章節中古天農認為首章《養兒育女》最難寫。「講嘅雖係基本嘢，但好多家長觀點根深柢固唔易改，如做錯嘢同子女講對唔住。」至於他最擅長的戲劇藝術，排得最後着墨亦不多。「若家長跟住本書做，理解多元智能、左右腦發展等有幾重要，實施出嚟已經係文化藝術。」

■古浚的私人書法室。

■商務印書館《天農百部》$58（書展八五折）

■屋企公司都有彈床要兒子跳了才打機。

■繪畫可增觀察力，這是古浚的自畫像。

馬仔大肚繼續低能

那天於新鴻基將軍澳中心舉行的「夏日全民運動會」見到馬仔以自己肖像作東亞運動會宣傳時，就即時省起以《我的低能之道》系列紅爆OL界的她，亦於書展推出《我的低能大肚之道》，記錄小圓山夫婦身懷女兒美美子期間的趣事。既為人母，沒想到本書如她所說「依然低能」。第一篇講驗到懷孕，找醫生再檢查時，還要低能問句「係咪生瘤」，原因她以前生過兩次瘤。「低能爆笑先係我風格，無諗過出溫馨小品。我啲書最初諗住畀大人睇，無預過有小學生讀者。懷孕後仲多埋媽咪讀者。」