上次寫「矯枉必須過正」，讀者Eric來電郵云：「矯枉必須過正」為毛澤東名言，全句為「矯枉必須過正，不過正不能矯枉，多少過火的政治政策都因此最高指示而起」。
多謝Eric提醒。收到電郵之日，剛好與一位網站主管吃飯，佢嘆息話雷曼迷債出事之前，佢哋網站吸引到不少投資產品廣告，而現在就幾乎一個都冇，原因係（一）證監會大力收緊產品審批；（二）基金公司即使得到批准，唔敢賣廣告，驚住俾人抽秤有誤導。主管好同意「矯枉必須過正」之說，但長此以往，香港國際金融中心之名，或要讓位咯，香港素來採用英式監管之Principle-based（原則為本），以後不如用美國嘅規則為本（Rule-based）。既然冇咗好多廣告收入，網站主管好驚要裁員。
此日下午得知陳德霖做金管局總裁，譚志源做特首辦主任。批評家黎定得指陳德霖做過特首辦，可能損害金管局獨立性，而受政治壓力。呢位英國紳士係任志剛老友，簡直攞嚟講。法律上，金管局總裁受命於財政司司長，黎定得做過金管局高層，佢知得清楚，歷任財政司/司長有冇向任志剛施壓呀？任何人做金管局總裁，都有可能受到財政司司長壓力，法例係英國人以前寫下嘅，與特區政府無關，你估如果你搵黎定得接佢老友個位，佢又可以頂得住財政司司長嘅壓力咩！如果財政司司長真係使用權力嘅話。
又有人講到譚志源做特首辦主任年紀太輕，笑話也。四十五歲嘞，仲話年紀太輕？呢個年紀，貝理雅、克林頓已經係政壇強人，任志剛已是金管局總裁，袁天凡已經做完港交所總裁，現任英國外交大臣文禮彬今年只得四十四歲咋。批評譚志源做特首辦主任，應該從佢嘅工作能力着手，而唔係笑佢太年輕。至於佢掂唔掂，六個月後先至評估啦。
本欄以廣東話為文，曾有人批評。一位讀者麥來函，就話廣東話有時比普通話更文雅。讀者麥指北方人講「下午」，廣府人講「晏晝」，蓋日已上三竿，乃云時晏，卜晝卜夜，比「下午」有古意得多啦。廣府人自然喜歡廣府話，香港人以廣府人為多，在芸芸專欄中，有一兩個廣東話專欄，或有生存空間啩。