內地《超級女聲》掀起歌唱比賽熱潮，香港變奏成《超級巨聲》、《星光大道》，原來同類比賽喺內地都有唔同版本，其中一個叫做「紅歌會」，係全國性比賽，據講觀眾達兩億人。紅歌會本年中更喺中共革命根據地井岡山舉辦咗一次「紅歌會警營區」大賽，參加者都係執法機關人員，香港警隊都有代表參加，更奪得「中國十大警察紅歌手」殊榮，紅遍井岡山。
著名男高音徒弟
參加呢個咁神聖嘅比賽唔容易，警隊高層組成遴選委員會，面試者要唱得、跳得而且講得（普通話），結果油尖區反黑行動組第三隊主管馬劍威出線。馬Sir1982年加入香港男聲聖詠團，有皇家音樂學院八級樂理及聲樂證書，係著名男高音呂國璋徒弟，閒時在教會教小朋友唱聖詩，係真正唱家班，佢話音樂係繁忙工作之餘嘅生活調節器。
根據最新一期《警聲》，比賽6月24日舉行，馬Sir早三日抵達江西備戰，預賽選唱《東方之珠》，因為代表香港人奮鬥精神。據講佢一鳴驚人，出線易如反掌，決賽都係唱呢首飲歌，有在場人士話穿上香港警察制服嘅馬Sir一登台，觀眾掌聲雷動，後來更全場大合唱，唱完歌佢多次謝幕，好似開個人演唱會。馬Sir好識做，在台上話：「這是我第一次來江西，這裏的山水很漂亮。」
共有21隊組合或個人進入決賽，馬Sir表現咁好，當選中國十大警察紅歌手，可惜不入優勝獎名單。呢次係香港警隊首次參加全國性歌唱比賽，馬Sir可以話為港爭光。現年48歲嘅馬Sir，當差約26年，之前守深水埗係刑事調查隊高級督察，曾智破一單玩火變縱火案。
參賽必選「紅歌」
講番紅歌會呢個比賽，參加者必須選唱「紅歌」，即係革命歌，代表作有《十送紅軍》、《紅旗飄飄》、《我們共產黨人好比種子》、《紅星照我去戰鬥》等，齋睇歌名都可以想像得到係歌功頌德、官方宣傳樣板歌，一般香港人應該好陌生，《東方之珠》唔夠「紅」，選擇參賽有啲牽強。為方便同公安唱K聯誼，警隊副處長曾偉雄上月帶隊訪問黑龍江，就學識咗唱《人民警察之歌》。
mailto:[email protected]