PS、XB360出嗰堆龍珠隻揪Game，唔係話唔好玩，不過又飛起、又反波、又爆超西123，無操開真係跟唔到個Beat。今次出喺Wii，仲要係跟日本播緊嘅新版《龍珠Z》進度，由元祖細粒悟空開始跟古仔玩，莊子、龜仙人、桃白白，掀起晒嗰陣落書屋租書睇嘅情懷！而且玩法係CG繪圖橫向捲軸，跑跳出波用棍「漚」，都係幾粒掣咋！
文：阿洛
元祖故事唔見芝芝
第一次接觸《龍珠》，係台譯本漫畫《七龍珠》，一講已成廿年前嘅事，日本早就嚟集體回憶，早前推出新版《龍珠Z》動畫，故事由居住深山嘅細蚊仔悟空，向世界出發重新開始。今次呢隻《天下一大冒險》就係跟呢個故事開波，由遇到桃白白、少女布瑪、無閑、龜仙人、貓仙人、紅帶軍逐步逐步嚟，睇嚟隻Game最後應該係去到打笛子魔王一幕，即係今集唔會見到魔童叔叔，亦無得變超西DeeDee聲。
簡易操作3D感覺
出喺Wii，好處係玩法簡單，邊行邊打，我哋由《雙截龍》開始已經係咁打機㗎啦！今次動作見到有二段跳、回避、拳打腳踢吹飛攻擊等，能源下有一條三格Bar，儲滿就係爆發龜波氣功嘅時候，儲夠氣就㩒掣出波，唔使搞餐懵。WiiGame都有隱憂，就係畫面唔夠靚，但今次CG動畫畫風就無乜影響，畫面都好姿彩；雖然係橫向捲軸，但都可以8方向移動，仲可以Fing掣儲氣，加上3D背景更做到好多變嘅陷阱，玩法雖簡單，但包唔會玩到悶。
武會再現二人對戰
仲有咩玩？雙打？無！網上合作？無！畀多咗你一個可以二人對戰嘅天下第一武道大會模式，有隱藏人等你慢慢打出嚟。另外亦可以喺冒險途中收集寶物，好似主持用嘅咪、龜仙人嘅太陽眼鏡、帽，同埋女性內褲等，未知有咩用，不過滿足到龍珠Collector！
Profile
遊戲：《DragonBall 天下一大冒險》
機種：Wii
發行公司：NBGI
類型：動作
人數：1人，2人對戰
推出日期：7月23日
