港股承接上周升勢，昨日輕鬆突破萬九點，恒指創出今年新高，急升696點，收報19502，大市成交增至777億元，動力明顯增強。
前陣子話唔做股神的四叔，曾揚言港股升見2萬點就會沽貨減磅，睇吓佢老人家稍後又會否改口風？
濠賭股好戲未完
股海成交金額持續上升，大價股帶頭炒上，由於市場資金充裕，估計後市升浪將遍及各類股份，其中濠賭股應係短期市場焦點所在，因澳門特首選舉在即，市場憧憬呢台戲圓滿結束後，中央將澳門自由行鬆綁，「送人」畀澳門以刺激當地旅遊業，為賭業股「進補」。
此外，金沙有意分拆澳門賭業及酒店業來港上市亦係濠賭股炒上之催化劑，客觀形勢有利濠賭股炒作。
新濠國際（200）近日限制叠碼仔碼佣為1.25%，當日消息一出已令股價爆升，昨續升6%，報4.72元，料後市未炒完，突破50日線4.85元阻力後，升勢將加快，短線目標5.50元，跌穿4.20元止蝕。
方星俠