一向man爆的方中信，為人父後一改浪子作風，面對13個月大的女兒迦晴時，顯出一副冧爆慈父相，難怪老婆莫可欣遭到冷落，並受老公變臉對待。可欣笑指女兒並非超級靚女，但勝在肉騰騰大有資格做「o靚o靚模」。
方中信這個大男人原來喜歡在個人網誌中寫女兒迦晴的近況趣事，最近他一家三口乘遊艇出海暢游，13個月大、肉騰騰的迦晴，穿上三點式泳衣，由廿四孝老竇親自教游水。
自認病態
方中信昨日接受電話訪問時說：「因為囡囡鍾意玩水，我喺屋企花園度都有吹氣泳池，成日同囡囡玩水，佢真係好肉地，我都鍾意咬佢大髀仔。」
方中信一向視車如命，不過為了囡囡早已放棄所有愛驅，如今只有一部平治七人車，他自嘲錫女錫到有病態。他說：「我放棄咗好多嗜好，不過日日對住佢真係值得嘅，以前我好怕BB，家我成日叫人生仔，因為家庭生活係好開心嘅。」他又自言已成為住家男人，囡囡的出現令他踏入人生另一階段。
莫可欣又投訴遭老公變臉對待，她說：「有時我同老公嗌交，佢一望見個女就即刻成個笑晒，一秒鐘變臉變得好快，對住個女佢真係最佳影帝。」對於囡囡越長越似媽咪，可欣笑說：「所以佢唔係超級靚女，不過佢夠得意，可以做超級o靚o靚模，家只有呢條女冧倒方先生。」
採訪：陳寶明
